Goberno e Por Viveiro acordan uns orzamentos con 200.000 euros en axudas a pemes e hostalería

O montante das contas do presente exercicio 2021 ascende a 13,1 millóns de euros

Loureiro e Fraga, en rolda de prensa. AXM

O Concello de Viveiro terá este ano un orzamento municipal de máis de 13 millóns de euros, “cun forte incremento no gasto social e unha nova liña de axudas para os sectores máis afectados pola pandemia”. Así o anunciaron a alcaldesa, a socialista María Loureiro, e Bernardo Fraga, concelleiro da formación independente Por Viveiro, coa que a formación de goberno pactou as contas.

Ambos presentaron os orzamentos e o segundo Plan de Reactivación Económica, que saen adiante grazas ao mesmo acordo que o adoptado o ano pasado co grupo Por Viveiro.

“Son unhas contas axustadas ao actual contexto económico e moi sociais, coa prioridade de axudar ás familias de Viveiro, os autónomos e a sectores como a hostalaría e o comercio”, asegura Loureiro.

UN MILLÓN DE EUROS MENOS CA NO 2020

O montante do orzamento deste exercicio 2021 ascende a 13,1 millóns de euros, un millón de euros menos que no 2020, tanto en ingresos como en gastos, sendo unha gran parte desta redución motivada polo cambio de taxa por tarifa nos recibos da auga e lixo, que foi aprobado en pleno en base á lexislación vixente.

“Outra parte desta redución no orzamento deriva da obra xa realizada en base á sentenza referida ao inmoble situado na rúa Nicolás Cora Montenegro, 50. Ao tratarse dunha baixada idéntica no capítulo de gastos e ingresos, isto non afecta á prestación de ningún servizo”, concreta Loureiro.

Trátase duns “orzamentos de emerxencia“, acordes á situación actual e á crise derivada da pandemia da Covid-19, “nos que cómpre destacar a continuidade das axudas directas aos sectores máis prexudicados. Neste segundo Plan de Reactivación Económica inclúese un importe total de 200.000 euros, presentando como novidade a existencia de dúas liñas de axudas“, continúa.

DÚAS LIÑAS DE AXUDAS

Unha delas está destinada en exclusiva ao sector da hostalaría, o máis afectado pola pandemia. Para a tramitación destas axudas está previsto que o Concello de Viveiro se adhira ao Plan de Rescate da Xunta de Galicia, de xeito que cada hostaleiro que cumpra os requisitos establecidos recibirá a axuda concedida pola administración autonómica e máis a cantidade achegada polo Concello de Viveiro. A esta liña de axudas destinaranse, aproximadamente, uns 100.000 euros e cada hostaleiro recibirá do Concello de Viveiro en torno aos 1.000 euros.

O Concello de Viveiro prevé adherirse a este convenio, para a tramitación conxunta das axudas á hostalería, tendo en conta que a Xunta de Galicia dispón de máis medios para realizar a tramitación cunha maior axilidade.

En todo caso, cómpre destacar que aqueles hostaleiros que non soliciten as axudas da Xunta de Galicia poden solicitar posteriormente as axudas convocadas polo concello.

A segunda liña de axudas está destinada a autónomos e pequenas empresas que por algunha circunstancia non puideron beneficiarse do Plan de Reactivación Económica de 2020, cumprindo coas bases que se establezan nesta nova convocatoria.

UN TOTAL DE 45.000 EUROS PARA EMERXENCIA SOCIAL

Dentro do Plan de Reactivación Económica tamén se entenden incluídas:

– A exención do pago da taxa por ocupación de terreos de uso público local con mesas, cadeiras e outros elementos análogos con finalidade lucrativa. Ordenanza núm. 13 (terrazas), cun importe aproximado de 40.000 euros.

– A exención do pago da Ordenanza núm. 6 de licenzas de apertura ou funcionamento, cun importe aproximado de 10.000 euros cada ano.

– A contía destinada a emerxencia social, que ascende a 45.000 euros.

“Tamén se están realizando xestións para non cobrar o recibo de auga e lixo para os locais que estiveron pechados forzosamente pola pandemia durante dito período”, expuxo Loureiro.

RESPOSTAR

Please enter your comment!
Please enter your name here