Por fin se abriron as fronteiras autonómicas tras meses pechadas. Un feito que este domingo provocou reencontros esperados a un e outro lado da ría. Neste sentido, o alcalde, Fernando Suárez, referiuse á ilusión do reencontro vivido “que só a covid puido cortar un tempo, pero que se cadra, agora e nos próximos tempos imos ir reforzando”.
“Podemos falar con certa ilusión do reencontro que vivimos xa onte cos nosos amigos e amigas da Veiga, de Castropol, de Navia, de Taramundi, de Tapia, dos Oscos e en xeral de toda a comarca do Occidente asturiano. Cónstame tamén que unha chea de xente de Ribadeo e da Mariña aproveitamos para cruzar a ponte e achegarnos a onde había tempo que non íamos. Reanudamos así unha relación de sempre, que só o covid puido cortar un tempo, pero que si cadra, agora e nos próximos tempos imos ir reforzando”, dixo a través dun comunicado.
Fernando Suárez anunciou que “desde o Concello estamos a preparar accións importantes para seguir facendo de Ribadeo un lugar de parada obrigada” para que Ribadeo siga sendo un referente para unha amplísima zona da Mariña luguesa e do Occidente de Asturias.
En todo caso, o alcalde fixo unha chamada á responsabilidade, “mentres que non se nos vaia a cabeza, debemos manter e facer todo canto nos digan as autoridades sanitarias”.