Sergas vacinará contra a Covid-19 a 13.350 persoas menores de cincuenta anos nos tres hospitais públicos da área sanitaria de Lugo, A Mariña e Monforte de Lemos. En total, para esta semana, foron citadas 23.092 persoas para recibir a vacina, aínda que o luns recibiron as doses correspondentes máis de 3.500 persoas de 50 a 59 anos que non acudiran a vacinarse cando foron citadas por primeira vez e tamén este martes a campaña está dedicada a esa franxa de idade, con 4.274 persoas citadas.
En total, das máis de 23.000 persoas citadas para recibir a vacina esta semana en Lugo, 14.438 persoas serán inmunizadas no HULA, outras 5.550 na Mariña e 3.104 en Monforte.
MENORES DE 50 ANOS
En canto ao grupo de idade de 40 a 49 anos, o mércores recibirán a primeira dose 4.450 persoas e exactamente o mesmo número foi citado para xoves e venres desta semana. O sábado os hospitais de Lugo estarán dedicados á aplicación de segundas doses de AstraZeneca e foron citadas 1.918 persoas.