O grupo provincial do PP de Lugo critica a situación de “abandono” do miradoiro ‘Os Paredones‘ de Mondoñedo, que ten o tellado desprotexido.
Os populares advirten de que a intervención realizada no interior do inmoble pola Deputación de Lugo a través dunha acción formativa á que se destinaron -con fondos autonómicos e provinciais- 274.000 euros, “estase a ver prexudicada porque non hai cuberta e chove dentro”.
A alcaldesa de Mondoñedo e voceira do PP provincial, Elena Candia, expón que “a cuberta está tapada cunhas lonas, o que favorece a entrada da auga e o conseguinte deterioro das obras feitas no interior do recinto”.
Candia denuncia o “desleixo” do goberno provincial, titular do inmoble. A dirixente do PP lucense asegura que a Deputación “está a destinar recursos a actuacións que ou ben non se acometen ou se fan de xeito deficiente”.
300.000 EUROS PARA REHABILITACIÓN
Nos orzamentos provinciais aprobados no pasado mes de novembro, a Deputación incluíu unha partida de 300.000 euros para a rehabilitación do miradoiro mindoniense, unha segunda fase de acondicionamento trala concluída no pasado verán.
O proxecto da Deputación consiste na conversión do inmoble nun albergue, o que choca coa intención da alcaldesa de converter o casco histórico de Mondoñedo en fin de etapa do camiño.