Os 15 integrantes da tripulación do palangreiro Coelleira, con base en Celeiro, foron rescatados despois de que o barco encallase en Vee Skerries, unha zona rochosa preto de Papa Stour, unha das illas das denominadas Shetland, en Escocia.

O buque, con 27 metros de eslora e de bandeira británica, perdeu o control e foi contra as rochas na madrugada do pasado domingo. Os tripulantes fixeron unha chamada de socorro á 1.30 horas.

Segundo expuxo a BBC, o barco de salvamento RNLI Aith e os equipos de gardacostas de Sumburg acudiron á chamada. Ningún dos tripulantes padeceu lesións de gravidade, aínda que foron evacuados en helicóptero ao Gilbert Bain Hospital, en Lerwick, para as correspondentes comprobacións.

A Marine and Coastguard Agency (MCA) asegurou que non se documentaron problemas de contaminación.

O BARCO FICA VARADO

O buque permanece encallado, como demostra un espectacular vídeo con dron do diario local The Shetland Times que poder ver neste enlace.

A Oficina de Investigación de Accidentes Mariños confirmou que comezou unha investigación para dar coas causas do accidente.

ZONA PERIGOSA

As Vee Skerries son un pequeno grupo de rochas arredor de tres millas ao noroeste de Papa Stour. É unha zona perigosa, na que se fixo un faro a finais dos anos 70 despois de que o barco Elinor Viking tivese un accidente na zona. No 1930, varias persoas morreron logo dun sinistro do arrastreiro Ben Doran, de Aberdeen.