Un home resultou ferido na tarde deste venres no concello mariñao de Barreiros despois de sufrir un accidente co tractor que manexaba.
O suceso ocorreu no lugar de O Morteiro, en San Xusto de Cabarcos. Foi o mesmo implicado quen, pasados dez minutos das 15.30 horas, chamou ao Centro de Atención Integrado de Emerxencias (CIAE) do 112 Galicia para pedir axuda. Indicaba que necesitaba asistencia porque tivera un accidente co tractor, estaba só e aseguraba estar atrapado.
A partir de aí, decontado, os xestores de emerxencias pasaron aviso ao Servizo de Urxencias Sanitarias de Galicia-061 e aos Bombeiros de Barreiros. De igual xeito, alertaron á Garda Civil e aos efectivos de Protección Civil da localidade.
EVACUADO AO HULA
Unha vez no punto, os Bombeiros comunicaron que non foi necesario excarcerar á vítima. Os membros de Protección Civil axudaron ao persoal sanitario na evacuación do ferido para, posteriormente, ser trasladado en ambulancia ao Hospital Universitario Lucus Augusti (HULA).
