Detido un viveirense que denunciou o roubo do seu coche despois de ter un accidente con el cando ía bébedo

Coa denuncia falsa, o arrestado pretendía eludir a responsabilidade do delito que supostamente cometera contra a seguridade do tráfico

Coche da Policía Nacional. AXM

EFE. Axentes do Corpo Nacional de Policía detiveron o pasado mércores a un veciño de Viveiro, un mozo con iniciais C. L. B., por denunciar supostamente de forma falsa a sustracción do seu propio vehículo, logo de inxerir unha gran cantidade de bebidas alcólicas e de sufrir un accidente co coche en Xove.

Os feitos que se lle imputan sucederon o pasado 15 de novembro, cando o mozo denunciou na Comisaría de Viveiro que lle roubaron o seu coche.

Con todo, os axentes da Policía Xudicial encargados da investigación comprobaron que ese mesmo día o mozo tomara unha gran cantidade de alcol nun período de tempo moi curto, nun local de Viveiro.

Posteriormente, colleu o seu coche e “nun momento dado, cando ía circulando co citado vehículo baixo os efectos do alcol, sufriu un accidente“, apunta a Policía Nacional nun comunicado.

O mozo foi auxiliado por un cidadán que circulaba pola mesma vía, quen lle facilitou o seu propio teléfono móbil para que chamase ao seu pai e acompañouno ata o seu domicilio.

REINCIDENTE

As investigacións posteriores, engade o Corpo Nacional de Policía, permitiron comprobar que a denuncia presentada era falsa, así como que con ela pretendía eludir a responsabilidade do delito que supostamente cometera contra a seguridade do tráfico. Ademais, o mozo é “reincidente” neste tipo de delitos.

RESPOSTAR

Please enter your comment!
Please enter your name here