Unha colisión lateral entre dous coches na rotonda de entrada á Autovía do Cantábrico (A-8), á altura do municipio de Barreiros, saldouse cun ferido leve.

O Centro Integrado de Atención ás Emerxencias (CIAE) do 112 Galicia recibiu aviso do sinistro sobre as 20.41 horas deste luns. En concreto, o accidente produciuse na glorieta que enlaza o polígono industrial barreirense coa entrada á autoestrada.

Daquela, o 112 Galicia mobilizou a operarios de Urxencias Sanitarias, Protección Civil de Barreiros, Garda Civil de Tráfico e Bombeiros de Barreiros.

Segundo precisaron fontes oficiais, só unha das persoas ocupantes dos vehículos requeriu atención médica e as restantes saíron ilesas do choque.