InicioSucesosAdiado de novo o xuízo ao Pequeno Nicolás por simular ser representante...

Adiado de novo o xuízo ao Pequeno Nicolás por simular ser representante da Casa Real en Ribadeo

A Audiencia madrileña cre que non se poden garantir as medidas de seguridade por mor do Covid-19; é o segundo aprazamento tras denunciar "presións" a primeira letrada do inculpado

Publicada o

- Advertisement -

EFE. A Audiencia de Madrid suspendeu o xuízo previsto para xuño a Francisco Nicolás Gómez Iglesias, o Pequeno Nicolás, por facerse pasar por representante do Goberno nunha viaxe a Ribadeo, ao considerar que non é seguro na situación actual de pandemia e non poder garantir que asista o fiscal.

Nun auto fechado en maio, ao que tivo acceso Efe, a Sección 17 da Audiencia madrileña suspende o xuízo previsto para os días 23, 24 e 25 de xuño por non considerar segura a súa celebración, “entre outras cousas por asignarse o seu coñecemento a determinado membro do Ministerio Fiscal que tería que desprazarse desde fóra da Península, e non existindo seguridade de que no momento do sinalamento exista un transporte fluído“.

Engade que tampouco está garantida unha infraestrutura que poida asegurar o cumprimento da denominada distancia social entre os membros do tribunal, entre os letrados ou os inculpados, e destes coas testemuñas.

SUSPENDIDO EN MAIO DO 2019

E solicita que se busque outra data para o xuízo oral contra o Pequeno Nicolás e dous policías municipais de Madrid que presuntamente o acompañaron na citada viaxe, despois de que o pasado 20 de maio de 2019 o mesmo xuízo suspendérase porque a letrada do principal acusado denunciou que recibira “presións“.

OS FEITOS OCORRERON EN 2014

Trátase da causa aberta contra Gómez Iglesias por presuntamente facerse pasar por un representante do Goberno e da Casa Real nunha viaxe a Ribadeo en agosto de 2014, para organizar unha comida co empresario Jorge Cosmen. Foi acompañado polos dous axentes nunha comitiva de catro vehículos de alta gama.

A Fiscalía pide para o mozo sete anos de cárcere e unha multa de 81.000 euros polos delitos de usurpación de funcións públicas, falsidade en documento oficial e suborno activo.

Para cada un dos policías solicita catro anos e dezaoito meses de prisión e multa de 4.500 euros polos delitos de usurpación de funcións públicas e suborno pasivo.

A acusación popular que exercen a Asociación de Policía Municipal Unificada de Madrid (APMU) e Podemos pide once anos de prisión para Gómez Iglesias; a Abogacía do Estado, 21 meses de cárcere e unha multa; e o Concello de Madrid reclama tres anos e medio de prisión.

OUTROS DOUS PROCESOS ABERTOS

Ademais deste proceso, o Pequeno Nicolás ten pendentes outros dous para os que xa decretou apertura de xuízo oral: un acusado de simular en 2014 que era asesor do Goberno para estafar a un empresario e outro por crear supostamente unha rede con policías e cargos políticos de Madrid para obter información policial e usala a cambio de favores.

En 2018 foi absolto pola Audiencia Provincial dun delito de inxurias e calumnias ao CNI, e arquiváronse outras causas abertas contra el desde que foi arrestado o 14 de outubro de 2014 acusado de facerse pasar por membro do CNI e do Goberno.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...