Un camión que transportaba madeira envorcou este martes no punto quilométrico seis da LU-160, na zona da Couboeira, á altura do municipio de Mondoñedo, segundo confirmaron fontes do Centro Integrado de Atención ás Emerxencias (CIAE) do 112 Galicia.

Segundo as mesmas fontes, foron os servizos sanitarios de Urxencias-061 os que deron conta do accidente, sobre as 10.46 horas, indicando que podería haber unha persoa ferida.

O 112 Galicia puxo o suceso en coñecemento dos Bombeiros de Barreiros, a Garda Civil de Tráfico, a Policía Local e Protección Civil.

Segundo precisaron os Bombeiros de Barreiros, o camioneiro non estaba atrapado, polo que non requeriu de excarceramento, e en principio non tiña lesións de importancia. O vehículo, que será levantado coa grúa, non perdeu a carga, que se está trasvasando arestora a outro camión. Si houbo que limpar a estrada ao romper o depósito de combustible, polo que se cortou un carril da mesma. Ao completar o levantamento do camión realizarase unha nova limpeza da vía.