Patronal e traballadores romperon este mércores as negociacións para alcanzar un novo convenio colectivo tras un encontro que, segundo a representación sindical, durou “10 minutos de reloxo” e que se produce no transcurso dunha folga indefinida.
Segundo informou a CIG, aínda que a empresa anunciara que na tarde deste mércores “trasladaría unha nova proposta económica que podería responder as demandas sociais”, ao comezo do encontro “negouse a informar da mesma pondo unha escusa tan peregrina como que o persoal estaba concentrado na porta”.
“Levamos 15 días facendo concentracións diante do Concello de Burela sen ningún problema e o primeiro día que facemos unha protesta -totalmente pacífica e silenciosa- diante das oficinas da empresa, véñennos co conto de que así non poden negociar, que senten coaccionados e que non nos van a trasladar a proposta salarial”, dixo Xoán Díaz.
Para secretario da CIG-Servizos de Lugo-A Mariña, a reacción de Urbaser “non é máis que unha escusa para bloquear as negociacións”, xa que “facer unha concentración cando hai unha reunión coa patronal, ademais dun dereito constitucional, é unha práctica habitual para visualizar a unión do persoal nas súas reivindicacións”.
Neste marco, os representantes dos traballadores apelaron ao Concello de Burela, a “administración responsable de velar polos dereitos laborais e salariais do persoal e de que se preste un servizo de calidade á cidadanía”.
