O presidente do comité de empresa de Alcoa San Cibrao, José Antonio Zan, urxe a que a Sociedade Estatal de Patentes Industriais (SEPI) se faga cargo da operación de compravenda da planta de Cervo, despois do fallo da Audiencia Nacional que condena a Alcoa a indemnizar ou recolocar a traballadores das fábricas da Coruña e Avilés.
Zan aprema ao Ministerio de Industria a que “se meta de cabeza vía SEPI” na planta de San Cibrao, unha cuestión que exporán na reunión deste xoves. Demanda que “a SEPI garanta toda a operación despois de que o xulgado diga que Alcoa actuou de mala fe coa Coruña e Avilés e só é posible esa fórmula para garantir que a venda sexa a un comprador fiable”.
“Esperamos que, canto antes, se poida garantir a operación e a SEPI sexa a que faga ese proceso de compravenda nun acto único que nos dea viabilidade para poder continuar e seguir sendo obreiros do aluminio primario”, reclamou para que non ocorra o mesmo que na Coruña e Avilés.
CONTACTOS CON TRES EMPRESAS
Así mesmo, o presidente do comité de empresa informou que mantiveron contactos co Grupo Liberty e outras dúas compañías interesadas na planta de San Cibrao. “Son dous grupos que parecen serios e solventes, son grupos industriais a diferenza da Coruña e Avilés, que eran grupos de investimento bastante dubidosos”.
Dos encontros con eses posibles compradores, o sindicalista de Comisións Obreiras puxo o acento en que “algún, mesmo, avanzou as solucións que ten na operación”. “Ao final hai que esperar que o Ministerio (de Industria) bote unha man e, dunha vez por todas, se molle; e que non teñamos que acudir aos tribunais, como fixemos ata agora, porque a decisión política segue sen tomarse”, apuntou.
Finalmente, o comité de empresa de Alcoa anima a toda a cidadanía a participar nunha concentración programada para o vindeiro domingo 20 de xuño en Cervo para reclamar unha solución.
