Que é XdM?

Cun centro punteiro no sector do aluminio, dous dos portos máis activos do Cantábrico e un singular atractivo turístico, A Mariña Lucense ten potencial para converterse nunha das bisbarras máis puxantes de Galicia. Malia confluír na zona concellos do litoral e do interior, os mariñaos teñen unha plena consciencia de comarca, afirmada por factores como a atención sanitaria no Hospital da Costa ou unhas comunicacións deficitarias. Para esas persoas, e tamén para aquelas que viven lonxe da súa terra sen esquecerse dela, nace o Xornal da Mariña, un diario dixital que tamén prestará atención ao que ocorra no occidente asturiano.

Abordará a actualidade política, económica, cultural, deportiva e social desta zona e prestará especial atención aos movementos sociais, ao medio ambiente e ao patrimonio. Ademais, será o primeiro medio galego, desde a época do precursor Vieiros, en informar sobre o que acontece nas zonas galegofalantes da comarca do Eo, un espazo cultural, social e económico que sempre estivo moi vinculado coa provincia de Lugo.

Ademais, este novo medio informará do resto da provincia grazas ás novas que lle achegarán o outros dous medios do grupo, Lugo Xornal, que informará sobre as comarcas do centro da provincia e Xornal de Lemos, que informará da zona sur.

Xornal da Mariña nace da man de Xornal de Lugo, S.L., e estará asociado a GC (www.galiciaconfidencial.com), o principal medio dixital en galego e un dos máis importantes no panorama mediático de Galicia, que lle dará soporte informativo, comercial e técnico. Todos os medios contan cun acordo para intercambiar información e publicidade.

Este medio conta cos xornalistas Ramón González Rey, na área da información da Mariña e Vanesa Gómez, na área de información do occidente de Asturias. Xosé Manuel González “Brais” exercerá como xefe comercial. Ademais colaborarán neste medio Óscar Bernárdez, Millán Gómez, Pilar Vázquez Prieto, Xurxo Salgado, Alberto Quián e Moncho Mariño.