A Federación Galega de Montañismo estudará emprazamentos para habilitar unha área de escalada en Mondoñedo.
As posibles ubicacións recolleranse nunha memoria sobre as condicións do municipio para practicar esta modalidade deportiva e o impacto potencia destas actividades na economía local.
O acordo tomouse nun encontro de traballo que mantiveron o vicepresidente da entidade, Nacho Jorge, o técnico da Escola Galega de Alta Montaña (Egam), Kiko Jordá, e a alcaldesa, a popular Elena Candia.
Jorge explicou que o municipio conta con zonas de “especial beleza”, que poderían acondicionarse para o uso dos afeccionados a este deporte. A intención sería “acotar o espazo, indicalo e crear unha normativa de uso”, precisou.
O Concello prestaría a súa colaboración para limpar de maleza os sitios elixidos e adecuar sendeiros. “Hai moita xente que durante a semana se exercita nos rocódromos e que a fin de semana prefire saír á natureza”, comentou.
O Penedo de Galo, en Viveiro, ou o monte da Frouxeira, en Foz, son os lugares aos que habitualmente acuden os escaladores na Mariña Lucense.
TURISMO ACTIVO
Candia enmarcou a o encontro na “aposta do goberno local polo turismo activo como un modo de poñer en valor os recursos da natureza e dinamizar economicamente a zona”.
Neste senso, apuntou que “xa o está facendo a través das rutas de sendeirismo ou coas visitas á Cova do Rei Cintolo“.
TOXIZA GRAN TRAIL
Precisamente, Mondoñedo acollerá esta fin de semana a quinta edición do Toxiza Gran Trail, con tres probas de montaña. O programa arrancará o venres cun carreira noctura na que os participantes tentarán coroar a Pena da Roca no menor tempo posible.
O sábado celebrarase unha andaina solidaria na que se realizará un percorrido de catro quilómetros polas rúas e arredores da cidade. O recadado coas inscricións destinarase a Asociación de afectados polo Síndrome de Fires.
O domingo será a proba estrela, unha carreira de montaña con tres opcións diferentes de distancia -14, 21 e 42 quilómetros- e desnivel. Os corredores e corredoras subirán ata o Pico Toxiza por pistas e sendeiros, percorrendo lugares como a Fraga Vella.
