O número de casos activos de coronavirus na provincia de Lugo segue en descenso. Segundo o reconto oficial ofrecido este mércores polo Servizo Galego de Saúde (Sergas) documéntanse 17 positivos, dous menos ca onte.
Non hai ingresados por Covid-19 no Hospital Público da Mariña. Os únicos dous hospitalizados na provincia a causa da pandemia, cifra que non varía, permanecen en plantas do Hospital Universitario Lucus Augusti (HULA). Outros 15 pacientes -dous menos ca onte- son atendidos en domicilio.
No histórico da provincia documéntanse 28 falecementos por mor do coronavirus, cinco deles na Mariña, ademais dunha sexta vítima que faleceu na Uci de Burela tras ingresar polo virus e superar a doenza no seu período na unidade de críticos. Déronse 919 altas.
A nivel galego, documéntanse 341 casos. Galicia leva unha semana sen documentar novas mortes pola pandemia.