As XXVII Xornadas Técnicas e o XXI Encontro Empresarial de Expomar, que ían ter lugar en Burela os pasados 28 e 29 de maio pero que se aprazaran pola situación de estado de alarma, finalmente celebraranse de forma telemática a próxima semana.
Na mañá do xoves 25 de xuño celebrarase a primeira edición virtual das Xornadas Técnicas de Expomar nos seus xa 27 anos de historia. Baixo o título “A Pesca, un sector esencial; e agora, que?” preténdese analizar a situación pesqueira actual desde distintos puntos de vista, tendo en conta o impacto do coronavirus e o Brexit nun sector esencial como a pesca, así como as principais repercusións sociais e económicas esperadas para os vindeiros meses.
O foro, que terá lugar entre as 10.00 e as 14.00 horas, comezará coa presentación a cargo do Presidente da Fundación Expomar, Alfredo Llano, e poderá seguirse en aberto a través dunha plataforma dixital. Ao longo da mañá intervirán a Secretaria Xeral de Pesca Marítima do Ministerio de Agricultura, Pesca e Alimentación, Alicia Villaoriz; a Directora Xeral de Pesca da Consellería do Mar da Xunta Galicia, Mercedes Rodríguez Moreda; o Presidente da European Fisheries Alliance (EUFA), Gerard van Balsfoort; e o Secretario Xeral de Cepesca e Presidente de Europeche, Javier Garat.
Como en tódalas edicións presenciais, ao finalizar o encontro terá lugar un debate aberto entre tódolos participantes, que será moderado polo Director de Abanca Mar, Javier Fraga.
A clausura das Xornadas Técnicas 2020 correrá a cargo da Conselleira do Mar da Xunta de Galicia, Rosa Quintana, e terá lugar a partir das 13.00 horas.
CITA PARA AS ORGANIZACIÓNS PESQUEIRAS
Pola súa parte, o venres 26 de xuño pola mañá celebrarase, por primeira vez de forma non presencial nas súas xa 21 edicións, o Encontro Empresarial de Organizacións Pesqueiras, que reúne cada ano ás entidades máis representativas da frota galega e ás asociacións profesionais do sector pesqueiro a nivel nacional.
A reunión dos representantes da frota terá lugar entre as 10.00 e as 13.30 horas por videoconferencia. Ao finalizar o evento, como cada ano presentaranse as conclusións aos medios de comunicación en torno ás 14.00 horas, momento no que se farán públicas.
Sen dúbida o principal tema sobre a mesa será o impacto do Covid-19 no sector pesqueiro, coas axudas, as estratexias europeas de impacto no sector pesqueiro, ademais de diferentes asuntos comerciais ou sanitarios derivados da crise do coronavirus.
Llano destaca “o grande compromiso que a Fundación Expomar ten co sector náutico-pesqueiro” e que, “debido a que este ano ía resultar moi difícil celebrar as Xornadas Técnicas ou o Encontro Empresarial de forma presencial, optouse por esta vía telemática como a mellor solución para poder afrontar a situación do sector con urxencia xusto uns días despois do levantamento do estado de alarma”.
“SERÁ UNHA DAS EDICIÓNS MÁIS RELEVANTES”
“Debido á grande trascendencia das decisións que aquí se tratan, sen dúbida esta edición convertirase nunha das de maior relevancia dos últimos anos, xa que tocará debatir a situación do sector pesqueiro xusto despois de superar a crise sanitaria do coronavirus e no momento de afrontar tódalas súas consecuencias socio-económicas”, concluíu.
As Xornadas Técnicas e o Encontro Empresarial están promovidos pola Fundación Expomar, en colaboración coa Deputación de Lugo e Afundación Obra Social Abanca, e financiadas polo GALP A Mariña Ortegal.
INSCRICIÓNS
Para poder asistir a este evento online hai que rexistrarse previamente na plataforma dixital a través da que se retransmite, o que pode facerse desde a web www.expomar.com.