O comité pon condicións para negociar con Alcoa: que non se paren as cubas e garantir o emprego nas auxiliares

A Xunta tacha de "decepcionante" a reunión e o Goberno central expresa a súa disposición a participar para garantir o futuro da planta.

Sindicalistas de Alcoa e auxiliares, pechados no consistorio de Xove. AXM

O comité de empresa de Alcoa en Cervo “acepta entrar a negociar” coa multinacional do aluminio tras a proposta que esta trasladou aos representantes dos traballadores. Iso si, “tendo clara” unha postura que se marca dúas liñas vermellas: “as cubas non se paran” e debe garantirse o emprego das empresas auxiliares.

Á espera de que haxa data para unha nova reunión, o comité mostra así a súa “plena dispoñibilidade”, despois da mesa multilateral celebrada este martes, que a Xunta tachou de “decepcionante” ao instar o Goberno central a que “tome a iniciativa” para marcar un prezo eléctrico competitivo. Pola súa banda, o Executivo mostrou a súa disposición a participar nese proceso negociador para garantir o futuro da planta da Mariña.

O presidente do comité, José Antonio Zan, lamenta que Alcoa “seguiu insistindo” este martes “en que necesitan parar as cubas, o proceso produtivo”. Pola súa banda, o persoal segue “dicindo que as cubas non se paran e aí existe un gran atranco”.

A empresa explicou no encontro “como ven eles a salvagarda das empresas contratistas“, pero o comité advertiu de que “terían que garantir tanto subministración como transporte á parte de contratistas e talleres arredor”, pois “todas elas son parte” do emprego de Alcoa. “Por iso, sen elas, non iremos”, avisou Zan.

Ao Goberno central, os representantes dos traballadores esixíronlle un marco enerxético “dunha vez por todas e canto antes”, para que poida haber “continuidade de produción” en 2022 e 2023, “para despois en 2024, se consegue unha PPA (contrato de compravenda de enerxía), o aplique”.

E insta a Xunta a “que apoie investimentos” necesarios “para actualizar a fábrica”, xa que “non vale só con dicir” que se está a favor da permanencia da factoría.

MINISTERIO

Pola súa banda, o Ministerio de Industria, Comercio e Turismo asegura que esixiu á empresa que presente “garantías dos investimentos anunciados dentro do plan de viabilidade que presentou para manter a planta de aluminio de San Cibrao, ben a través de coberturas bancarias ou con avais”.

“Estas garantías son necesarias para dar confianza e seguridade ao proceso de reindustrialización da factoría”, subliña o departamento de Reyes Maroto.

Tamén pediu garantías para a subministración de aluminio aos clientes que actualmente ten a empresa e “que se teña en conta toda a cadea de valor do aluminio na toma de decisións”.

O Ministerio afirma que expresou a súa disposición a participar no proceso de negociación para garantir o futuro da planta “no formato que se aprobe por parte de Alcoa e o seu comité de empresa”.

Tamén reiterou que porá a disposición do proceso “todos os instrumentos de política industrial e enerxética para facer que a planta sexa competitiva e poidan modernizarse as súas instalacións”.

“Para o Ministerio de Industria é fundamental que o proceso de negociación continúe para garantir o futuro do complexo industrial de San Cibrao”, subliña.

XUNTA

Pola súa banda, o vicepresidente económico da Xunta, Francisco Conde, tachou de “decepcionante” a mesa porque “nin Alcoa levou unha proposta concreta nin o Goberno trasladou a súa iniciativa sobre como resolver o prezo eléctrico e, por tanto, manter a produción do aluminio primario”.

“Lamentablemente estamos nunha situación na que estamos nunha viaxe a ningunha parte. Instamos a Alcoa e ao Goberno a que neste marco de negociación se incorpore o prezo eléctrico como o obxectivo principal deste marco de negociación, porque, se non, será seguir dando voltas a un proceso para non chegar a ningunha parte e non dar unha solución definitiva”, remarcou.

Neste sentido, reclamou ao Goberno “que tome a iniciativa e non deixe que parta de Alcoa” e pediu “seriedade e rigor para que poida trasladarse unha solución definitiva cun prezo eléctrico”. E é que, como lembrou Conde, a empresa “está a dicir que non é posible manter a produción dous anos porque non hai un marco eléctrico”.

RESPOSTAR

Please enter your comment!
Please enter your name here