A Xunta reformará “a vindeira semana” as conducións de augas pluviais do Virxe do Carme

CxG instará á Fiscalía a investigar se "houbo neglixencias" nas funcións de mantemento do centro

Aula inundada no Ceip Virxe do Carme. AXM

A Xunta de Galicia anunciou este xoves que intervirá “ao longo da vindeira semana” no Ceip Virxe do Carme de Burela, onde a comunidade educativa está a padecer numerosos problemas a causa do estado de deterioro do centro.

A Consellería de Educación afirmou que acometerá “unha obra de emerxencia” para corrixir as filtracións de auga que se están a producir en diferentes puntos do colexio.

O delegado territorial da Xunta de Galicia en Lugo, José Manuel Balseiro, comunicou a membros da dirección do centro e representantes da Anpa que o Goberno galego reservou “unha partida económica urxente de 23.000 euros” para os traballos.

Reunión da comunidade educativa do centro coa Xunta. AXM

As actuacións consistirán nunha reforma integral nas conducións de augas pluviais. Segundo a explicación do Goberno galego, anularase o canlón de zinc incrustado no interior do aleiro da cuberta, deteriorado nos seus enlaces e con carencia de morteiro.

Así, realizarase unha nova ponte de lousa entre ambos treitos do tella para canalizar a auga cara o exterior. Tamén se renovarán baixantes e ancoraxes.

A Xunta precisa que para facer algúns destes traballos será preciso a demolición parcial da cuberta, sobre todo para acceder as canalizacións interiores, procedéndose á súa reposición unha vez finalicen as obras.

Tamén se prodecerá ao cambio dos canlóns e baixantes dos patios interiores do edificio 3, como á reparación dos caleiros do ximnasio.

O Goberno galego reitera que está a estudar “unha reforma integral” para o centro, e atribúe ao Concello “unha mala conservación e mantemento das instalacións”.

CxG APELARÁ Á FISCALÍA

Compromiso por Galicia (CxG) Burela anunciou este xoves que “o vindeiro luns” presentará un escrito na fiscalía de Mondoñedo para que “depure responsabilidades” e “valore se houbo actos de neglixencia” e incumprimento do estipulado no Decreto 374/1996, do 22 de xullo.

Segundo establece a normativa, o goberno local debe asumir as competencias no mantemento do centro, mentres que a Xunta velará polas melloras que sexan necesarias.

O secretario xeral do partido, Juan Carlos Piñeiro, sinala que “o que queremos é ir ao fondo desta cuestión, porque os problemas do Virxe do Carme veñen de antes, da falta de xestión do alcalde, Alfredo Llano, e do anterior rexedor, Chema Barcia”.

CIG: “A XUNTA NON INVESTIU”

A CIG-Ensino expresou nun comunicado o seu apoio á Anpa e culpou á Xunta dos problemas do centro, polo seu “desleixo” e “falta de investimentos ao longo dos anos”.

O sindicato nacionalista insta ao Goberno galego “a garantir o dereito do profesorado e do alumnado de ter un centro seguro, digno e funcional”.

ESTE VENRES, CONCENTRACIÓN

A Anpa convocou para este venres, desde as 8.50 horas no patio do colexio, unha concentración para reivindicar o arranxo do centro.

Desde a asociación de nais e pais piden o apoio á sociedade mariñá para reclamar unha mellora do colexio que acabe coas súas carencias.

RESPOSTAR

Please enter your comment!
Please enter your name here