A concelleira de Mar, Carmela López, presentou en Portos de Galicia un escrito pedindo cambios para a práctica da pesca deportiva no porto burelés. A edil acordounos na xuntanza mantida cunha representación dos pescadores recreativos da vila e co presidente da Confraría de Pescadores, Basilio Otero.

No escrito remitido a Portos de Galicia formúlanse peticións como a mellora nas condicións de acceso á zona portuaria. Que se permita a pesca deportiva entre o espigón até a Confraría e a antiga Fábrica de Xeo.

Permitir tamén a pesca en embarcacións sempre que non realicen ningunha operación e estean atracadas. Tamén se solicita revisar o aforo máximo dun pescador cada cinco metros xa que “nos parece excesiva distancia e moi difícil de cumprir”.

A concelleira de Mar, Carmela López, explicou que “me reunín con Basilio Otero e cos pescadores o pasado mércores, día 25, pola tarde no porto de Burela”. A concelleira aclarou que estas conversas xa se manteñen desde hai moitos meses.

A primeira xuntanza data de setembro do ano pasado e a partir de aí houbo distintas reunións, con acceso ao borrador do documento presentado a Portos e mediante a Confraría e a Federación a Concellaría de Mar estivo ao tanto do que se ía propor.