O alcalde de Burela defende que as familias que van ser desafiuzadas queden ata 2029

Lembra que son vivendas de protección da Xunta e así figuraba nas condicións.

Alfredo Llano. AXM

O alcalde de Burela, Alfredo Llano, reivindicou este luns que ata o ano 2029 tense que “garantir” a vivenda a tres veciños dun edificio situado no número seis da rúa Cantábrico, que poderían ser desafiuzadas esta semana pola Sareb ou banco malo.

En concreto, o 27 de xaneiro vence o prazo para o desaloxo deste tres veciños nese inmoble de 16 vivendas que conta con protección autonómica da Xunta desde o ano 2004.

Llano enunciou que “ata o 2029 ten que garantirse que se esta xente quere continuar no edificio continúe”. “Sería moi dramático que cambie o titular do edificio e ese novo titular marque outros prazos cando se debe de cumprir a normativa e ata o 2029 non se deberían (os inquilinos) mover de aí”, abundou.

O rexedor de Burela lembrou que “das 16 ocupacións que había, agora quedan tres porque o resto buscou a vida polas condicións que lles esixían”. Estes “buscaron outra alternativa e fóronse ata quedar tres (familias) e o resto foise asentando noutros lugares do concello” de Burela.

Quedaron tres veciños coa garantía de que se lles vai a renovar ata 2029“, insistiu. Alfredo Llano apuntou que se trata dun edificio “moi céntrico, á beira da igrexa” e volveu a incidir en que é un inmoble que ten “protección autonómica desde o ano 2004 e o que accedía a un piso tiña que cumprir unhas condicións”.

Dito isto o alcalde de Burela subliñou que “esta situación vén determinada polo imperativo do capital sobre as persoas e iso si que non pode ser porque hai que defender o dereito das persoas sobre o capital”, concluíu.

1 COMMENT

  1. Ogallá tivesemos máis alcaldes así… Veremos que sucede coas 3 familias !
    O problema da SAREB é que lle demos 65.000 M€ por nada e sen condicións…!
    E agora forman parte dos Fondos Espculativos que quixemos atallar na crise do 2008…
    Cría Corvos…

RESPOSTAR

Please enter your comment!
Please enter your name here