Un detido pola vaga de roubos en vivendas da Mariña

O home, interceptado en Lourenzá, xa ingresou en prisión.

Lourenzá. TURISMO.GAL

A Garda Civil detivo no municipio lucense da Lourenzá a un veciño da localidade de Padrón como presunto autor de 14 roubos en vivendas, así como por condución de vehículos co carné retirado e baixo os efectos de sustancias estupefacientes. Tras pasar a disposición xudicial foi enviado a prisión.

Segundo informou o Instituto Armado, ao longo do pasado mes detectáronse na Mariña lucense roubos no interior de segundas vivendas e, en ocasións, en residencias de primeiro uso. As mesmas fontes relataron que para roubar accedían tras romper xanelas, polas que entraban para apoderarse da grifería da instalación de baños e cociñas e do aparello calefactor, coa súa correspondente instalación de cobre, aínda que en ocasións subtraer outros obxectos de valor.

Ademais, nunha das vivendas foron roubadas seis guitarras valoras en 3.500 euros, un órgano, xoias e 1.200 euros en metálico. Mentres, noutra subtraeron xoias por valor duns 5.000 euros. As investigacións iniciais apuntaron á participación nos feitos delituosos dunha persoa veciña do municipio coruñés de Padrón, á que lle constaban numerosos antecedentes policiais por feitos similares.

Os investigadores descubriron que esa persoa realizara numerosas vendas de cobre, xoias e outros efectos que se correspondían cos roubos da Mariña e outros puntos da provincia. Ademais, chegaron a relacionar a compravenda das guitarras subtraídas con esa persoa, así como parte das xoias, obxectos que foran vendidos na provincia da Coruña e Asturias.

No marco das pescudas, o pasado día 2 procedeuse á identificación do presunto autor, quen levaba no seu vehículo obxectos procedentes dunha vivenda achandada esa mesma mañá, así como outros procedentes de roubos ocorridos en días anteriores.

Por iso, axentes da Benemérita procederon na localidade da Lourenzá á detención deste veciño de Padrón de 32 anos de idade, como presunto autor de 14 delitos de roubo con forza nas cousas en vivendas, así como outro de condución de vehículos co permiso retirado e outro de condución baixo os efectos de sustancias estupefacientes.

INVESTIGACIÓN ABERTA

O detido en relación con eses roubos foi posto a disposición do Xulgado de Instrución número 1 de Mondoñedo, que decretou o seu ingreso en prisión. As investigacións continúan, xa que non se descarta a participación do individuo noutros feitos delituosos ocorridos na zona da Mariña, tendo en conta que, puntualiza a Garda Civil, “a maioría das vivendas achandadas, ao ser de segunda residencia, non se detectan ata que os seus propietarios acceden a elas en períodos vacacionais”.

RESPOSTAR

Please enter your comment!
Please enter your name here