Coma o dedo no cu. Ser de contra o rabo. Entrar na chousa. Falarse con alguén. O García. A chalina. Que se vexa Landrove. Por suposto, chucho, pícara ou o botiquín. Son algunhas das palabras e frases recollidas en apenas uns días pola conta de Twitter Así Falamos na Mariña, unha escolma do galego que se fala desde O Vicedo ata Ribadeo.
Cando alguén non se sabe apartar dos coches, o @CarlosJimenezd, de Viveiro, dícelle: “o que tes, faiche falta”. Esta idea de “ir na reserva” intelectual repítese nas linguas dos países que testan coa Mariña, como o inglés (being a borderline) ou o asturiano (faltar una patatina). pic.twitter.com/EomabGt57D
— Así falamos na Mariña (@FalaMarinha) November 5, 2019
Cun fino sentido do humor, os promotores da conta enriquecen o vocabulario propio coas achegas dos internautas para crear un divertido, dinámico e gorentoso dicionario a través da rede social, revelador para os que viven máis alá do Fiouco (descubrirán por fin, entre outras cousas, que é “a fórmula” que gusta tanto a Pep Guardiola) e no que os mariñaos atoparán expresións familiares, pero tamén outras novas.
Cando alguén é artista e curioso traballando, nótase. Por exemplo, @bertez, que é do Vicedo. Montou unhas estanterías de Ikea na sala e quedáronlle coma o dedo no cu. Perfectamente encaixadas. 🍑👈 pic.twitter.com/FcZXZbbqWX
— Así falamos na Mariña (@FalaMarinha) November 3, 2019
En apenas unha semana de actividade, a conta aproxímase aos 800 seguidores. E é que a creatividade do galego da Mariña consola, pero en cantidades moderadas, non se acabe por mangar o cazo.
