EFE. O debuxante Xosé Vizoso, que practicamente naceu cun lápis na man, foi durante catro décadas a man dereita de Isaac Díaz Pardo en Sargadelos. A súa inmensa obra artística composta por murais, esculturas, retratos, carteis, ilustracións, caricaturas ou deseños para cerámica, pódese ver agora nunha web documental.
“Eu debuxo desde pequeno. Recordo estar sempre co lápis na man. Se vía algunha figura facíaa. Foi algo que naceu comigo”, conta a Efe Xosé Vizoso (Mondoñedo, Lugo, 1950), quen erixe ao cabalo como a súa “obsesión”, pois era o animal que debuxaba nas feiras das San Lucas e que foi o protagonista de numerosos dos seus posteriores deseños.
O DEBUXO, “LINGUAXE INTERNACIONAL”
Tras formarse nun curso no Castro de Samoedo en 1968, ano no que conseguiu o Premio Nacional de Escultura, Vizoso converteuse, xunto con Xosé Díaz, nun dos primeiros diseñadores que tivo a empresa de cerámica Sargadelos.
“O debuxo é o máis importante para resolver cousas. É internacional, como a música”, considera o polifacético artista que recalca a súa capacidade comunicativa, “pois alguén que non saiba idiomas pode entenderse debuxando” e lamenta “que o están quitando moito das escolas”.
MÁIS DE 300 PORTADAS E 130 CARTEIS
Vizoso realizou numerosas ilustracións inspiradas no rural galego, entre as cales se atopan as máis de 300 portadas feitas para Edicións do Castro e outras editoriais, mentres que os seus carteis, de festas populares, feiras artesanas ou concursos, son máis de 130.
UN CREADOR “SEN NARCISISMO”
Con todo, remóntase aos seus inicios para rememorar as súas primeiras creacións en Sargadelos, encargadas por Díaz Pardo: catro murais construídos con porcelana, pizarra, xornais e outros materiais.
“Con Isaac aprendín moito. Tiven o privilexio de estar con el toda a miña vida laboral”, confesa Vizoso sobre o intelectual galeguista do que destaca a súa capacidade para “resolver cousas” e “a disciplina de darlle voltas” ás obras “para chegar a algo. Se fas vinte bocetos mellor que dez“, engade.
Unha carta asinada por Díaz Pardo en 1988 acredita que “este mindoniense ten máis virtudes que as artísticas” pois “a súa admirable disciplina para concibir, proxectar e realizar formas non crearon nel ningún tipo de narcisismo“.
PARTICIPARON TRES CENTROS EDUCATIVOS
Estas capacidades e a súa inmensa obra propiciaron que Arraianos Produccións impulsase un completo proxecto web, coa colaboración da Deputación da Coruña, do IES Rosalía de Castro de Santiago de Compostela, do Instituto de Brión e do Colexio de Pedrouzos.
Aglutina un documental de vinte minutos, a súa biografía, imaxes das súas obras, videocreacións, unha banda sonora e unha parte pedagóxica na que participan os alumnos dos tres mencionados centros escolares.
“Sempre nos interesou destacar este tipo de personalidades que están nun segundo plano ou á sombra”, subliña nunha charla con Efe o director e coordinador da iniciativa, Aser Álvarez, que define a Vizoso como “un home humilde e pouco dado ao ego”.
Fascínalle tanto a historia do mindoniense que espera que esta web, que están presentando, sexa “o inicio dun proxecto expositivo grande”, que poña a este home “no lugar que se merece”.
Completan o equipo que participou neste traballo Aldán Delgado, encargado da montaxe; Moisés Quintas, creador da banda sonora e o fillo do protagonista Daniel Vizoso, quen deseñou a web.
