O Pescados Rubén Burela FSF segue con paso firme na Primeira División despois de gañar os títulos da Recopa de Europa e a Supercopa. O conxunto laranxa gañou a domicilio en Móstoles (1-4), onde encarrilou o triunfo con dous goles nos dous primeiros minutos.
O cadro burelao puxo axiña terra de por medio no marcador en Villafontana, ante un dos rivais de maior tradición na máxima categoría. Aos 9 segundos, Ale de Paz anotou o primeiro tanto do equipo que preparan Julio Delgado e máis Lucas. Pouco despois, antes de que se cumprise o minuto 3, Jenny Lores marcou un 0-2 que daba ao Burela FSF moita tranquilidade.
O conxunto da Mariña Lucense non tardou en ampliar a renta a tres goles. Fíxoo por medio da á viveirense Lara Balseiro. E nunha tarde na que estivo especialmente atinada, Ale de Paz marcou o 0-4 pouco despois de que se cumprise o primeiro cuarto de partido.
Na segunda metade, o conxunto burelao freou calquera tentativa do equipo madrileño de meterse no encontro. O 1-4, obra de Inma, non chegou ata o minuto 37.
VINDEIRA XORNADA
Na vindeira xornada, o Pescados Rubén FSF volve a Vista Alegre para recibir ao Majadahonda. O Atlético Futsi Navalcarnero, vixente campión de Liga e que semella o principal rival do equipo burelao, tamén gañou a domicilio -2-7 en Murcia– e suma igualmente seis puntos.