Segundo informaron fontes da Unión Xeral de Traballadores (UXT), o Tribunal Superior de Xustiza de Galicia (TSXG) emitiu unha sentenza na que confirma a nulidade do despedimento no 2016 da que fora presidenta do comité de empresa da fábrica de Sargadelos en Cervo, Rogelia Mariña.

A sindicalista foi cesada en decembro de 2016 polo conselleiro delegado do grupo empresarial, Segismundo García, co que a traballadora mantén unha tensa relación.

Daquela, o sindicato argumentou que Mariña fora despedida por negarse a que o cadro de persoal “traballase media hora máis sen unha compensación económica“. A empresa alegou “motivos disciplinarios” por “actitudes reivindicativas excesivas” para considerar o despedimento procedente.

READMISIÓN OBRIGADA

No mes de febreiro do 2018, o Xulgado do Social número 3 de Lugo declarou nulo o despedimento de Mariño.

A sentenza recoñecía á traballadora a readmisión no seu posto de traballo nas mesmas condicións que tiña antes do cesamento, a percepción dos salarios deixados de cobrar desde o 30 de decembro de 2016 e unha indemnización de 30.000 euros por danos morais, o que o TSXG ratifica.

a central pedirá que segismundo garcía pague “do seu peto” os 30.000 euros de indemnización

A UXT considera “significativo” que o fallo reitera que García “ten que responder solidariamente, xunto coa mercantil, do pago a Mariño” dos 30.000 euros de compensación. Así, o sindicato asegurá que solicitará ao Xulgado “que sexa o conselleiro delegado” quen proceda ao abonamento desta cantidade “do seu peto“.

AS DÚAS PARTES RECORRERON

Tanto Mariña como a empresa e García presentaron recurso de suplicación contra a sentenza. A sindicalista esixiu unha compensación económica maior -ata de 70.000 euros-, mentres que Sargadelos e o máximo accionista pedían a absolución.

MARIÑA PEDIU o aumento DA COMPENSACIÓN A 70.000 EUROS, O QUE NON FOI CONCEDIDO

O fallo do TSXG considera que o cesamento de Mariña no 2016 “é incardinable no ámbito do despedimento nulo pola súa vulneración da liberdade sindical, da liberdade de expresión e da garantía de indemnidade“.

Os xuíces entenden que “non se ofreceron razóns por parte da empresa para xustificar a decisión drástica do despedimento, de xeito que a mesma non está xustificada nin se ampara en motivos razonables que poidesen insertarse no ámbito de poder da mercantil“.

Por outra banda, os maxistrados desestiman aumentar a contía da indemnización á sindicalista ao considerar que os 30.000 euros referidos “axústanse ás circunstancias do caso”.

os xuíces cren que o cesamento vulnerou “a liberdade sindical, a liberdade de expresión e a garantía de indemnidade”

CONFLITO LABORAL

Tralo regreso da ex presidenta do comité á fábrica, o enfrontamento entre Mariña e o conselleiro delegado non fixo máis ca recrudecerse.

O pasado 17 de agosto, o máximo accionista de Sargadelos acusou á obreira de presionalo con impugnar o contrato de 49 traballadoras da fábrica -unha acusación que Mariña negou- e fixo estalar un conflito laboral co anuncio e a execución de varios despedimentos -e mesmo a ameaza de pechar a factoría-, o que desembocou na destitución da sindicalista polas súas propias compañeiras en asemblea.

DEMANDAS PENDENTES

O sindicato, que perdeu a súa representación na fábrica trala revogación da súa ex delegada, recorreu ante o TSXG a demanda por vulneración de dereitos sindicais que fora desestimada polo Xulgado do Social número 2 de Lugo a finais do pasado mes de outubro.

Ademais, a UXT tamén interpuxo demandas por conflicto colectivo -en relación cos contratos realizados na fábrica ao longo do último ano e medio, que segundo o sindicato incumpren o convenio-, contra a asemblea de empregadas que destituíu a Mariña, e tamén varias denuncias por despedimentos “arbitrarios” durante o conflicto laboral do pasado verán.