Conde alerta en Viveiro do impacto da marcha de Alcoa e Ence para A Mariña

O conselleiro de Economía mantén o ton agresivo da Xunta nun acto coa militancia do PP

Francisco Conde, na xuntanza celebrada en Viveiro. AXM

EFE. O conselleiro de Economía, Emprego e Industria, Francisco Conde, recoñeceu que o Goberno galego está “moi preocupado” polo futuro de Alcoa en Galicia e insistiu en que o presidente do Executivo central, Pedro Sánchez, é quen “ten a chave para atopar unha solución”, que pasa por establecer “un prezo eléctrico competitivo”.

Nun encontro en Viveiro, no que estivo acompañado por candidatos ao Congreso, ao Senado e ás vindeiras eleccións locais, Conde asegurou que se está “a frivolizar co tema enerxético”, cando a “tendencia” á alza dos prezos da electricidade “está afectando a todos os sectores produtivos e incluso ás familias”.

O conselleiro quixo contrapoñer “a irresponsabilidade política” do actual Executivo coa forma de actuar do Goberno anterior, porque “Alcoa sempre estivo presente na mesa de Rajoy“, como o demostra “a xuntanza que mantivo en Estados Unidos para defender os postos de traballo en San Cibrao e A Coruña“.

ENCE E A MARIÑA

Conde tamén fixo referencia ao posible peche de Ence, pola repercusión que terá na Mariña Lucense, unha comarca cun “peso moi importante” na comercialización e venta de madeira.

Desde o seu punto de vista, resulta “incomprensible” e xera “unha gran inseguridade xurídica” que a Abogacía do Estado no 2016 adoptase a decisión de validar a ampliación da concesión e que, dous anos máis tarde, “o Goberno diga que non se axusta a dereito”.

IGLESIAS PROPÓN A INTERVENCIÓN

O candidato de Unidas Podemos á presidencia do Goberno, Pablo Iglesias, prometeu este venres impulsar “unha política industrial seria” para facer fronte aos “sectores poderosos” e propuxo utilizar a Sociedad Estatal de Participaciones Industriales (SEPI) para intervir Alcoa.

Nun acto público en Xixón con varios colectivos sociais, o líder de Podemos pediu aos traballadores da multinacional alumineira, que mantén os plans de pechear as súas plantas de Avilés e A Coruña, que se manteñan “organizados e fortes”.

MÁIS DUN MILLÓN DE BAUXITA MOVIDA EN 2019

Autoridade Portuaria de Ferrol-San Cibrao comunicou este venres que as súas dársenas cerraron o primeiro trimestre do 2019 con máis de 3,5 millóns de toneladas de mercancías, un dato que sitúa “no podio das mellores da historia da institución”.

Para a institución, o listaxe de mercancías “transloce a importancia que a enerxía e a metalurxia continúan tendo nos muelles de Ferrol e San Cibrao”. O carbón lidera a clasificación con 1.506.117 toneladas movidas, por 1.076.271 da bauxita.

RESPOSTAR

Please enter your comment!
Please enter your name here