Máis de 300 traballadores do complexo de Alcoa en San Cibrao, ademais dun bo número de veciños e tamén representantes das administracións locais da Mariña Lucense, levaron este mércores a Madrid a súa protesta para esixir ao Goberno central que aprobe un estatuto das electrointensivas que rebaixe significativamente o prezo da luz e favoreza dese xeito a continuidade da planta de aluminio, onde a multinacional parou 32 cubas e que a empresa ve “inviable” sen un abaratamento da enerxía eléctrica.
Segundo explica o comité de empresa de Alcoa San Cibrao, fletáronse “catro autobuses de 65 prazas“, pero ducias de persoas desprazáronse tamén a Madrid en vehículos particulares. Participaron representantes de todos os sindicatos con representación no organismo de representación dos traballadores –CC OO, CIG e UGT-, ademais da central estatal USO, un dos tres convocantes xunto con Comisións Obreiras e a Unión General de Traballadores; tamén asistiron obreiros de Alu Iberia, Asturiana del Zinc ou Arcelor, para un total dun milleiro de persoas que reclamaron estabilidade para a industria electrointensiva.
Ademais, estiveron nas protestas representantes de distintos partidos políticos, como Miguel Tellado (PP), Antón Gómez Reino (Podemos) ou Pancho Casal (En Marea), ademais de, entre outras autoridades, o delegado territorial da Xunta en Lugo ou os alcaldes de Cervo e Xove, e tamén colectivos veciñais como Cruz da Venta.
Berrando consignas como “enerxía solución” ou “a industria sálvase loitando“, os traballadores plantáronse primeiro ante o Congreso dos Deputados, para visibilizar a situación da fábrica ante todos os grupos políticos, e despois fronte ao Ministerio para a Transición Ecolóxica, delegación -encabezada por Teresa Ribera– á que responsabilizan dunha poxa de interrompibilidade que resultou nefasta para os intereses de Alcoa, pois practicamente eliminou unha das vías gubernamentais para aliviar o prezo da luz á industria pesada.
O COMITÉ: “SEN ESTATUTO, NA MESA IMOS FALAR DO TEMPO”
O presidente do comité de empresa, José Antonio Zan, non ocultou a súa decepción polo feito de que o Consello de Ministros non aprobara o pasado martes o estatuto das empresas electrointensivas, porque opina que a reunión a catro bandas prevista para o vindeiro xoves en Lugo -entre Alcoa, Executivo, Xunta de Galicia e sindicatos- carecerá de contido e será para “falar do tempo“.
O comité de empresa pediu nos últimos días ao Goberno que aprobase ese estatuto antes da xuntanza, prevista para as 13.00 horas, e na que por parte do Executivo participará o secretario xeneral de Industria e da PYME do Ministerio de Industria, Comercio e Turismo, Raül Blanco; tamén asistirá o conselleiro de Economía, Francisco Conde.
En declaracións a EFE, o presidente do comité aseverou que, tendo en conta de que o principal problema que lastra a competitividade da fábrica é o prezo da enerxía eléctrica, ao presentarse os representantes do Goberno na mesa de seguimento sen o estatuto aprobado, ese encontro só servirá “para falar do tempo“.
“A ver de que falamos, se non temos nada de que falar”, sostivo Zan, quen recoñeceu que o estado de ánimo nestes momentos é de “moito enfado” por parte do persoal.
“SÓ TEMOS BOAS PALABRAS”, AFIRMAN OS SINDICATOS
“Incumpren a súa palabra unha vez tras outra“, dixo o presidente do comité, porque a aprobación do estatuto ía ir ao primeiro Consello de Ministros do novo Goberno, pero “xa pasaron tres e nada”, lamentou.
Sobre a reunión entre os tres grandes sindicatos estatais, convocantes da protesta, e o Goberno central, trala que o Executivo asegurou que o estatuto das electrointensivas está pendente de “tres trámites“, Zan mostrouse escéptico. “Non temos nada; antes precisábase un Goberno, sen estar en funcións, agora tres trámites… Moi boas palabras, pero non hai nada enriba da mesa”, concluíu.
Por agora, precisa o sindicalista, non hai novas protestas previstas, á espera dos acontecementos que poidan ocorrer trala xuntanza do vindeiro xoves. Preguntado pola posibilidade de que Alcoa aplique algún recorte no emprego trala xuntanza, o sindicalista asegura “non descartar nada”. O vindeiro Consello de Ministros será o martes.
Á ESPERA DA COMISIÓN EUROPEA E A CNMC
O Goberno tentou este mércores gañar tempo. Blanco, que manifestou o “compromiso inequívoco do Goberno de aprobar en próximas datas o estatuto”, explicou tras unha reunión cos sindicatos que actualmente só faltan tres trámites para que o Consello de Ministros o poida aprobar.
O primeiro é conseguir garantir que a Comisión Europea (CE) non o poida botar para atrás; que dea o seu visto bo a Comisión Nacional dos Mercados e a Competencia (CNMC), onde a proposta encallou en abril pasado ao observar Competencia que algunhas medidas podían incurrir en axudas de Estado prohibidas pola CE; e para rematar, a súa aprobación polo Consello de Estado.
“Faltan trámites, peros somos optimistas sobre que en próximas datas vai estar todo dispoñible”, afirmou Blanco, que recordou que, ademais, o estatuto do consumidor electrointensivo forma parte dos acordos con varios grupos parlamentarios para a investidura de Pedro Sánchez como presidente do Goberno, entre eles Podemos ou BNG.
CC OO AMEAZA CON MOBILIZACIÓNS “NUN OU DOUS MESES”
Agustín Martín, de CC OO, asegurou que o proceso para aprobar o Estatuto “está a piques de culminar” e afirmou que desde o sindicato non entenderían que os trámites que quedan se atrasasen demasiado.
Martín dixo que CCOO seguirá atenta e se o Estatuto non se aproba nun ou dous meses, seguirá mobilizando aos traballadores destas industrias.
Martín, que espera que o Estatuto poida ser aprobado en próximas semanas, asegurou que a central non vai permitir que se escuden en se o Estatuto se atrasa máis ou menos para abrir expedientes de regulación de emprego temporais nin que deixen de investir nas fábricas.
A XUNTA ESIXE AO EXECUTIVO QUE LEVE “MEDIDAS CONCRETAS” Á MESA
O conselleiro de Economía demandou ao Goberno que leve “medidas concretas” á mesa de seguimento da situación de Alcoa San Cibrao.
Conde afirmou que Alcoa vive unha “situación límite” porque “o Goberno non concreta o contido do estatuto de electrointensivas. Non parece razoable que o Goberno siga con esta política de xestos, con declaracións contraditorias entre a ministra de Traballo e a ministra de Industria”, censurou o conselleiro. “O único que temos é un silencio por parte do Goberno e a falta dun prezo eléctrico competitivo”, reprocha.
