O Partido Popular (PP) anunciou a presentación dunha moción para debater no vindeiro pleno provincial para que a Deputación inste á Entidade Pública Empresarial do Solo (Sepes) e a Suelo Empresarial del Atlántico (SEA), dependentes do Estado, para que rebaixen o prezo do solo nos parques empresariais que promoven e xestionan na provincia de Lugo, entre eles os de Ribadeo e Mondoñedo.
Os conservadores fan esta proposta despois de que a Xunta de Galicia puxese á venta 750.000 metros cadrados en 17 parques empresariais cun prezo de saída bonificado de 28 millóns de euros. En Viveiro hai doce parcelas á venta, cun custo de 1,3 millóns, mentres que en Cervo están a subasta quince terreos, por 654.512 euros.
Os conservadores aseguran que “á vista da actual situación, é evidente que algúns destes parques empresariais non responderon, ata o momento, ás expectativas que suscitaron; o custo do solo converteuse nunha das principais dificultades para a súa ocupación”, argumentan.
A voceira do PP provincial, Elena Candia, considera que “para que estes parques empresariais sexan competitivos co solo industrial desenvolto noutros concellos, dependente da Xunta de Galicia ou da Deputación Provincial, ata agora por medio de Suplusa, é preciso que a oferta de solo por parte de Sepes e SEA se efectúe a un prezo similar ao de outras administracións”.
Igualmente, demanda que a Deputación asuma os compromisos adquiridos por Suplusa, agora en liquidación, “para construción e xestión, con prezos competitivos, de modo que se garanta aos concellos a continuidade dos parques empresariais que estaban programados”.
“DESACELERACIÓN”
O PP asegura facer a proposta “cando se constatan os primeiros síntomas de desaceleración da economía. Por elo, é urxente facer que empresas e emprendedores recobren a confianza e impulsar a súa actividade investidora. Coa finalidade de impulsar os ditos parques empresariais, atraer investimentos que permitan fixar novas oportunidades profesionais, que incentiven o crecemento produtivo, económico e laboral nas comarcas nas que se ubican, é necesario que a institución provincial se dirixa a Sepes e SEA para que rebaixen o solo nos parques empresariais”.
