A Mariña Lucense viviu este domingo unha xornada histórica de reivindicación, cunha das protestas máis multitudinarias da súa historia. Un total de 17.000 persoas segundo a Policía, 25.000 na versión dos sindicatos, marcharon en Viveiro para esixir unha solución para a planta de aluminio do complexo industrial de San Cibrao, onde Alcoa anunciou que ten intención de executar un Expediente de Regulación de Emprego (ERE) con 534 despedimentos, un recorte produtivo que afectaría a outros 400 operarios de empresas auxiliares.
Nunha protesta que os sindicatos enfocaron como “a manifestación das familias“, o acto reivindicativo serviu para simbolizar -os veciños con camisolas negras e ataúdes en sinal de loito, entre traballadores vestidos de faena- a importancia socioeconómica que ten para a comarca da Mariña Lucense a produción de aluminio, unha actividade que durante máis de catro décadas garantiu estabilidade laboral na zona e soldos dignos. Os obreiros reclaman a Alcoa que retire o ERE anunciado e ao Goberno central que interveña a planta e aprobe unha tarifa eléctrica que favoreza a continuidade da produción.
Fotografías de Juan Maya e Diego Alonso Cobelo.