O comité do complexo industrial de San Cibrao solicitou ao Goberno central que convoque canto antes a mesa multilateral polo futuro da planta de aluminio, coa presenza de Liberty House, a multinacional radicada en Gran Bretaña que segundo comunicou Alcoa está interesada en comprar as dúas fábricas de Cervo.
Segundo concretou o presidente do comité de empresa, José Antonio Zan, á saída da reunión mantida en Lugo entre Alcoa e os sindicatos dentro da negociación do Expediente de Regulación de Emprego (ERE) presentado pola multinacional, que suporía máis de 900 despedimentos entre a planta de aluminio e a industria auxiliar, a propia titular do complexo industrial “deunos unha carta do presidente e CEO de Liberty House” na que o grupo “solicita comprar” as dúas factorías de San Cibrao. “Están dispostos a manter o complexo unido e facer un sistema integral do metal en Europa para servir (ás fábricas) a Dunquerque (Francia) e Escocia“.
Malia a entrada no escenario dun comprador, Alcoa mantén que non venderá sen primeiro parar as cubas de electrólise, o que para os obreiros sería consumar “a morte” do complexo. Deste xeito, na xuntanza do proceso, que remataría o 4 de agosto, tampouco houbo acordo. “Queren executar os despedimentos sexa en directo ou en diferido e facer o mesmo que na Coruña e Avilés, coa diferenza de que agora temos un serio competidor industrial querendo mercar o complexo industrial de San Cibrao.
No tocante á planta de alúmina, a multinacional asegura que “non está en venda”, indicou o sindicalista.
“ÁBRESE UN CAMBIO SUBSTANCIAL”, RESALTAN OS OBREIROS
“O primeiro que necesitamos é unha reunión da mesa multilateral á que se debera convidar a este novo socio”, afirmou Zan, que concretou que o vindeiro venres -ás 9.30 horas en Lugo- haberá unha xuntanza coa Consellería de Traballo. “Debemos aclarar toda a problemática, dado que o conselleiro (Francisco Conde) dixo que se había un comprador abríase un cambio substancial polo que se debía paralizar durante un tempo o ERE”, concretou o sindicalista. A Xunta de Galicia, autoridade laboral, non ten potestade para deter o despedimento colectivo, pero si para solicitar a súa suspensión.
SOLICITARÁN UNHA REUNIÓN CO POSIBLE COMPRADOR
Zan apuntou ademais que os sindicatos están “á espera” de poder reunirse co posible comprador para poder avaliar o proxecto en detalle: “o que limos na carta soa ben pero hai que afondar. En calquera caso, que unha empresa tan potente estea interesada nunha venda significa que como planta temos viabilidade”, argumentou o presidente do comité.
Ante unha posible negativa de Alcoa a frear o ERE e negociar unha venda sen parar a maquinaria de electrólise, Zan manifestou que “o primeiro que debera facer o Goberno é intervir a planta; España e a Xunta non poden permitir que unha multinacional peche a única factoría de aluminio primario que hai no país”, rematou, lembrando que a produción permanece recortada nun 11% desde o pasado verán.
CONCENTRACIÓN EN SANTIAGO
O vindeiro venres, os traballadores seguirán os seus actos de protesta por unha solución para a fábrica cunha concentración nocturna en Santiago de Compostela.