EFE. Unhas oito mil persoas participaron este verán nas visitas guiadas á fábrica de cerámica de Sargadelos durante os meses de xullo e agosto.
En declaracións a EFE, a control manager de Sargadelos, Emma Álvarez, recordou que as visitas guiadas ao centro tiveron sempre “unha gran demanda por parte de xente interesada en coñecer o proceso produtivo, que esperta moita curiosidade, pero nesta ocasión a resposta foi excepcional pola gran cantidade de xente que pasou polas instalacións de Cervo”.
“Vímonos un pouco desbordados e tivemos que facer ata tres grupos diferentes -de 25 persoas- en cada un dos tres quendas, porque cada día visitaron a fábrica en torno a unhas duascentas persoas, unha cifra moi superior á rexistrada o ano pasado”, dixo Emma Álvarez.
A fábrica está aberta ás visitas durante todo o ano, de 09.00 a 14.00 horas, explicou, pero con estes percorridos guiados “dáse un paso máis”, porque os visitantes, ademais de percorrer a planta, reciben unha “explicación sobre o que están vendo e sobre o proceso produtivo da cerámica de Sargadelos”.
De feito, confirmou que este verán visitaron a fábrica “ata profesionais do sector, que estaban interesados en coñecer o noso proceso produtivo”.
TODO O ANO, CON CITA PREVIA
Fóra de tempada, tamén se poden facer visitas guiadas á fábrica de Cervo, pero mediante cita previa e en grupos de dez persoas como mínimo.