A portavoz nacional do BNG visitou este sábado Cervo para presentar a campaña dos nacionalistas de cara á celebración do 25 de xullo. Así, aproveitou este acto para referirse a a situación pola que aínda atravesa a planta de Alcoa en San Cibrao.

Esta factoría é “un exemplo de libro de como as forzas estatais discriminannos impedindo que nos beneficiemos da nosa riqueza eléctrica”, advertiu Pontón, para seguidamente prometer que o Bloque seguirá “moi de preto” o encontro previsto para o luns entre a ministra de Industria, Reyes Maroto, e a dirección da multinacional.

Así, volveu a reclamar a intervención da Sociedade Estatal de Participacións Industriais (SEPI): “O futuro pasa porque haxa unha mediación da SEPI nesa compra, porque moitos nos tememos que poderiamos estar ante outro fracaso como o vivido en Alcoa na Coruña, e sería unha irresponsabilidade por parte do Goberno do Estado e da Xunta permitir un novo fracaso”.