O vicepresidente económico da Xunta, Francisco Conde, ve “claramente inxusta” a decisión de peche da fábrica de Viveiro que anunciou Vestas este luns, ante o que esixe “implicación” ao Goberno central para “reverter” a situación, a pesar de que as competencias, din dende o Goberno, corresponden á Xunta. Pola súa banda, Conde compromete “traballo conxunto” co comité de empresa e o Ministerio de Industria “para identificar cales son as posibilidades para poder reverter esta situación e sobre todo cales poden ser as posibilidades de manter o emprego”.

“Lamentablemente a decisión da empresa leva a unha situación límite aos traballadores. É unha situación claramente inxusta. Esperamos que haxa un cambio de actitude por parte da empresa e unha implicación por parte do Goberno”, destacou o vicepresidente económico e conselleiro de Economía este mércores.

Ao seu xuízo, son “as decisións de política enerxética” as que “están a levar a que en Galicia se estea producindo un desmantelamento industrial”, neste caso “de industrias vinculadas ao sector eólico”.

“Significa”, na súa opinión, “que a política enerxética non está a acompañar ás necesidades da política industrial”. “Non hai certidumbres e iso está a levar a que primeiro nas Somozas e hoxe en Viveiro esteamos a atravesar unha situación inxusta que Galicia non se merece”, incidiu.

Por iso, a Xunta vai reclamar ao ministerio “unha rectificación da política enerxética e que se poida implicar na procura de solucións para que se poida manter o emprego” de Vestas Viveiro.