O Club Deportivo San Cipirán presentou unha nova Escola de Atletismo que se suma á oferta deportiva do concello de Cervo. O proxecto partiu da atleta local Olga Vicente, que será unha das encargadas de adestrar ás persoas que se anoten nesta nova actividade.
Dende o Concello de Cervo aplauden a iniciativa, que se presentou nas pistas de atletismo do Complexo Deportivo da Veiga. “Dende o Concello comprometemos todo o noso apoio para contibuír a impulsar este novo proxecto, que sabemos que xa está a espertar moito interese entre a nosa veciñanza”, afirmou o alcalde de Cervo, Alfonso villares.
Pola súa banda, dende a Federación Galega de Atletismo amosaron moito interese polo proxecto, e o seu Vicepresidente, Suso Vázquez, puco en valor a creación deste: “É un paso moi importante para este deporte na Mariña”, salientou.
A actividade está destinada a persoas de todas as idades, e relizaranse nas instalacións do complexo Deportivo da Veiga, que conta cunha pista de atletismo con 6 rúas cunha lonxitude de 400 metros.