O PP de Lugo avanza que presentará emendas á lei de Orzamentos Xerais do Estado (PGE) para abaratar os custos enerxéticos das industrias electrointensivas a través de compensacións pola compra de dereitos de emisión de dióxido de carbono, despois de comprobar que as contas son “unha decepción” para os intereses da provincia.
Así o anunciaron os populares lucenses nunha rolda de prensa na que participaron a presidenta provincial, Elena Candia, o vicesecretario de Participación do PP nacional, Jaime de Olano, e outros deputados e senadores.
Ante a valoración “negativa” que fixo Candia dos PGE para 2022, animou aos socialistas lucenses a aproveitar que están este fin de semana no Congreso Federal do PSOE, en Valencia, para conseguir “o compromiso” do presidente do Goberno, Pedro Sánchez, cunha solución para Alcoa.
“Non é máis que cumprir o compromiso adquirido por todos nos concellos, na Deputación, no Parlamento de Galicia, no Congreso e no Senado”, dixo, á vez que cualificou como “determinante” que a Sociedade Estatal de Participacións Industriais (SEPI) “tome partido”.
