A borrasca Karine deixou nas primeiras horas deste martes refachos de vento máximas de 143,3 quilómetros por hora (km/h) na localidade de Viveiro e de 122,9 km/h en Manzaneda.
Así consta nos rexistros de Meteogalicia ata as 9.30 horas deste martes, nos que se reflicte que, en municipios con altitude inferior a 900 metros, ademais do 143,3 km/h en Viveiro, o vento deixou refachos de 103,8 km/h en Ortigueira; de 101,2 en Burela e de 96,4 na localidade coruñesa de Malpica.
Mentres, en concellos con altitude de máis de 900 metros o vento alcanzou, ademais do 122,9 km/h en Manzaneda; o 116,7 km/h en Cervantes; os 98,6 en Carballeda de Valdeorras e os 94,7 no lucense de Baleira.
PRECIPITACIÓNS
En canto á choiva, ata as 9.30 horas contabilizáronse acumulacións de precipitacións de 35,7 litros por metro cadrado en Vilariño de Conso; 34,2 en Pedrafita; 30,2 en Abadín e 29,2 en Vilalba, o tres municipios lucenses; así como 29 litros por metro cadrado en Fornelos de Montes e, na provincia da Coruña, 28,6 en Lousame e 28,4 en Monfero.
Este martes as baixas presións atlánticas continuarán deixando ventos fortes e ondas superiores aos cinco metros de altura no litoral norte, polo que A Mariña seguirá en alerta laranxa por temporal costeiro ata ben entrada a tarde.
PLAN DE RISCO POR INUNDACIÓNS
De feito, a Xunta activou o Plan Especial por Risco de Inundacións de Galicia (Inungal) ante a subida dos caudais en ríos das concas de Galicia-Costa debido ás choivas asociadas á borrasca Karine.
A Consellería de Infraestruturas e Mobilidade, a través do Organismo Augas de Galicia, informa de que, segundo o sistema Artemis de previsión de avenidas, “espérase un incremento do caudal xeneralizado nas concas de Galicia-Costa”.
Deste xeito, segundo esta previsión, recolle o 112 nas súas alertas, “poderanse superar os caudais críticos na conca do Río Umia na entrada ao encoro de Caldas, durante a mañá deste 3 de marzo”.
Respecto diso, o 112 advirte nos seus avisos que “o comportamento da conca do Río Umia pode estar condicionado pola xestión do encoro”. En previsión deste fenómeno, a Dirección Xeral de Emerxencias e Interior activou na noite deste luns o Plan Especial para o risco de inundacións en Galicia, “en fase de alerta”, concreta.
Por iso, o 112 incide na importancia de adoptar as “medidas preventivas necesarias” e “alertar ou mobilizar os medios e recursos” oportunos.
