O Concello de Viveiro fixo un balance do curso 2020-2021 e informou de que ten solicitada unha reunión co conselleiro de Cultura, Román Rodríguez, para buscar solución á “grave discriminación” que sofre o o conservatorio.
Segundo indican, o conservatorio acolle alumnado de catorce concellos diferentes, tanto da comarca da Mariña como doutros municipios da provincia da Coruña. En concreto, hai alumnos e alumnas de Alfoz, Burela, Cariño, Cervo, A Coruña, Foz, Lourenzá, Mañón, Ortigueira, Ourol, Ribadeo, O Vicedo, Viveiro e Xove.
Dende o Concello de Viveiro destacan a “grande importancia” do servizo prestado, e sinalan que en Galicia hai 21 conservatorios profesionais de música dependentes dos concellos e, polo tanto, “asumindo unha competencia que corresponde á Xunta de Galicia”. No caso de Viveiro, trátase ademais do conservatorio profesional de música dependente dun concello que se atopa “máis lonxe dunha capital de provincia, onde os conservatorios profesionais existentes si que dependen da Xunta de Galicia, igual que no caso das cidades de Vigo, Ferrol e Santiago de Compostela”, o que consideran “unha grave discriminación con respecto ás grandes cidades”
Nos últimos tres anos, aseguran, o conservatorio recibiu unha pequena subvención por parte da Xunta de Galicia, ademais da subvención concedida pola Deputación de Lugo, pero “estas axudas e máis os ingresos correspondentes a matrículas e mensualidades non cubren, nin de lonxe, os gastos derivados do servizo, que ademais da súa importancia cultural ten a máxima importancia educativa”.
