Axentes da Policía Local de Ribadeo e da Garda Civil evacuaron a un grupo dunhas 30 persoas que quedaron atrapadas pola marea na zona da praia das Catedrais, segundo informaron fontes policiais e do 112 Galicia.

O servizo galego de emerxencias recibiu un aviso a última hora da tarde deste martes por parte dun particular que alertaba de que había moita xente no areal e que a marea estaba a subir, co risco que iso supuña.

O 112-Galicia trasladou o aviso á Policía Local e á Garda Civil e, cando chegaron os efectivos evacuaron a zona sen que se producisen incidentes, salvo algunhas persoas que tiveron que saír camiñando con parte das pernas xa cubertas por auga.