O presidente da Xunta de Galicia e do Partido Popular a nivel autonómico, Alberto Núñez Feijóo, e a presidenta provincial do PP, Elena Candia, arrouparán ao candidato dos conservadores á alcaldía de Burela, Manuel Rouco, nun mitin que se celebrará o vindeiro sábado 6 de abril, a partir das sete e media da tarde, no salón de actos do local da Asociación de Armadores de Burela (ABSA).

Tamén intervirá o cabeza de lista dos populares lucenses ao Congreso dos Deputados, o viveirense Jaime de Olano, que explicará aos participantes as medidas que dende o PP defenderon na Cámara Baixa durante a última lexislatura en relación á comarca da Mariña Lucense.

Os populares participarán previamente nun encontro de confraternidade con afiliados e simpatizantes da zona.

POLÉMICA

Rouco, enxeñeiro agrónomo de 42 anos que sucede a Chema González Barcia como candidato do PP en Burela, viuse envolto en polémica semanas atrás, cando o PSOE o acusou de exercer irregularmente como xuíz de paz de Cospeito ao incumprir as obrigas de residir no municipio e de carecer de afiliación política.

O alcaldable popular renunciou voluntariamente ao cargo e censurou aos socialistas por “insinuar” que o Tribunal Superior de Xustiza de Galicia (TSXG), que o nomeou para o cargo, “prevaricou”.