A Plataforma na Defensa da Sanidade Pública da Mariña e mailo Servizo Galego de Saúde (Sergas) polemizaron este xoves pola atención en hematoloxía no Hospital da Costa. O colectivo alerta da suspensión de consultas por falta de persoal, o que o Sergas nega.
A agrupación explica que o centro hospitalario -que atende a unha poboación superior aos 70.000 habitantes– quedou cun só especialista “dos tres que hai actualmente, dado que un deles colleu un permiso e a terceira hematóloga foi derivada ao Hospital Universitario Lucus Augusti (HULA), como está a suceder cada xoves”.
O colectivo asegura que soubo desta situación “a través de pacientes aos que se lles suspendeu a consulta”, e acusa á Consellería de Sanidade de “someter a un agravio a esta comarca, pois están a derivar outra facultativa cara o HULA, que dispón de dez hematólogos no cadro de persoal. Estamos abandoados”, expón Víctor Vila, voceiro da plataforma.
A denuncia prodúcese un día despois de que CIG-Saúde acusase á Xerencia de Lugo de dispensar un trato discriminatorio á Mariña Lucense, logo de contratar “seis fisioterapeutas para o HULA” mentres o servizo de fisioterapia está “en absoluto deterioro na bisbarra” tralo cese do concerto cunha clínica privada.
LOGOPEDIA
Neste senso, a plataforma sostén a fin do convenio non só prexudicou a atención no tocante á fisioterapia, senón tamén á logopedia, pois o centro privado prestaba tamén este servizo.
Segundo o colectivo, pais e nais alertaron “dun abandono total ao quedar as súas crianzas sen logopeda sen que o Sergas lles dera unha explicación”.
A Plataforma na Defensa da Sanidade Pública da Mariña acusa ao Sergas de “desmantelar os servizos sanitarios na comarca” e esixe aos dirixentes do Partido Popular Daniel Vega e José Manuel Balseiro “que saian da coelleira e dean a cara” ante esta situación.
RESPOSTA DO SERGAS
Pola súa banda, o Sergas emitiu un comunicado de resposta no que afirma que “non se suspendeu ningunha consulta do servizo de hematoloxía do Hospital Público da Mariña”.
Segundo argumenta o Sergas no texto, o hospital “conta con dous hematólogos no seu cadro de persoal e, dende hai uns meses, a Estrutura Organizativa de Xestión Integrada (EOXI) de Lugo contratou un terceiro especialista, de reforzo, que acude catro días á semana ao centro hospitalario. Polo tanto, as consultas e están programadas sempre para eses días”, indica.
Trala solicitude dun permiso programado por un dos especialistas, “programouse toda a actividade da axenda, sen que se suspendese ningunha consulta”. O comunicado conclúe que “unha vez máis estase a empregar a sanidade pública para xerar malestar e confusións”.
PARÁLISE CEREBRAL E TDAH
Na tarde do venres, o Bloque Nacionalista Galego (BNG) alertou de que a Xunta de Galicia eliminou os convenios coas clínicas que tratan ás persoas con parálise cerebral e Trastorno por Déficit de Atención e Hiperactividade (TDAH).
A situación, explican os nacionalistas, afecta a toda a área sanitaria de Lugo, Cervo e Monforte de Lemos. Podes ler a nova completa no Lugo Xornal.
