Denuncian que as derivacións de operacións a Lugo ou A Coruña “castigan” os pacientes sen recursos

A plataforma sanitaria alerta do caso dun cervense que non puido operarse dun xeonllo por carecer de "medios económicos" para desprazarse

Imaxe dunha das mobilizacións convocadas pola plataforma sanitaria. FACEBOOK PLATAFORMA SANITARIA A MARIÑA

A Plataforma na Defensa da Sanidade Pública da Mariña denunciou este xoves que as derivacións para intervencións cirúrxicas a Lugo e A Coruña “penalizan as persoas con falta de recursos económicos”.

O colectivo sanitario alerta do caso dun paciente cervense que presentou unha reclamación ao considerarse “agraviado” logo de que o Servizo Galego de Saúde (Sergas) rexeitase “aboar os gastos de desprazamento” para someterse a unha operación.

O doente, que padeceu unha rotura de menisco no xeonllo esquerdo, entrou en listaxe de agarda para ser intervido cirúrxicamente o 26 de xuño do pasado ano. En xullo, a dirección do Hospital Público da Mariña ofreceulle a operación “na sanidade privada, en Lugo ou A Coruña”.

O doente solicitou entón que se lle bonificase o desprazamento, unha petición que foi denegada. Segundo a plataforma, “desde entón pasa a unha listaxe B ou non estrutural, segundo a Estrutura Orgánica de Xestión Integrada (EOXI), para ser operado no Hospital da Mariña”.

O paciente entendeu esta situación como “un castigo” e presentou unha reclamación ante as posibles consecuencias que teña a espera pola operación, non só a nivel de saúde, senón tamén no eido laboral. O doente advirte de que teme “perder o emprego” polo tempo de baixa.

A plataforma esixe á Xerencia do Hospital Público da Mariña que “se poña no lugar dos veciños” e defenda “os intereses dos máis desprotexidos”, para garantir “un trato por igual a todos, independentemente de onde vivamos e dos nosos recursos económicos”.

O SERGAS: “É UN CASO DE SERVIZOS SOCIAIS”

Fontes do Sergas argumentan que se trata dun caso “para os servizos sociais municipais”, e sosteñen que “se o paciente está ingresado e os médicos ou traballadores sociais detectan determinadas situacións, avisan a quen corresponda ou xestionan residencias”.

Preguntadas pola situación do paciente nas listaxes de agarda, as mesmas fontes sinalan que as prioridades se determinan “por situación clínica“. 

RESPOSTAR

Please enter your comment!
Please enter your name here