Sindicatos e partidos reclaman a cobertura da médica de baixa en Alfoz

Concello, VIA e CIG instan á Xunta a que substitúa de forma estable á profesional pola dispersión xeográfica e o envellecemento poboacional do municipio

Centro de saúde de Alfoz. AXM

Trala denuncia da veciñanza de que o centro de saúde de Alfoz conta estes días cun só médico de familia, dado que o Servizo Galego de Saúde (Sergas) non cubre a unha facultativa de baixa desde principios do mes de abril, sindicatos e partidos reforzaron a petición de que se substitúa á profesional de forma estable.

A CIG denunciou que o pasado luns “o único médico tivo que saír a tres visitas domiciliarias, quedando o centro de saúde sen atención médica”.

O sindicato lembra que o centro de saúde de Alfoz presta servizo a 1.566 tarxetas sanitarias, e remarca a “dispersión xeográfica” do municipio, “o cuarto da provincia de Lugo cun maior envellecemento da poboación”, polo que esixe a cobertura da profesional de baixa.

O alcalde, o socialista Jorge Val, anunciou días atrás que remitiría un novo escrito á Xunta de Galicia, e recordou que o pleno aprobou por unanimidade no pasado mes de novembro a cobertura das ausencias.

Veciños Independentes de Alfoz (VIA) anunciou que tamén requeriu ao Sergas unha solución. O voceiro do partido independente, Xabier Pardiñas, afeoulle á Xunta “que poña como desculpa que a sobrecarga de traballo do médico non é excesiva baseándose unicamente no ratio máximo desexable de pacientes por galeno. O número de asistentes a consulta aquí é máis elevado porque hai moitos doentes de avanzada idade”, expuxo.

“POSIBLE MARCHA” DA FACULTATIVA

Pardiñas pide ao Sergas que aclare a situación “ante a previsible marcha a outro centro da doutora que está actualmente de baixa, algo inadmisible e inxusto que non se debe permitir”, afirma.

RESPOSTAR

Please enter your comment!
Please enter your name here