Abre un albergue para recuperar o paso dos peregrinos por Vegadeo

A xestora propón un programa de dinamización para que o municipio sexa polo de atracción no Camiño norte

Albergue de Vegadeo. AXM

Os peregrinos que percorren o cada vez máis concurrido Camiño do Norte teñen un novo punto no que facer parada. Este venres inaugúrase o albergue Mar y Montaña en Vegadeo. Lilian De Campos, quen xestionará as instalacións tras obter a concesión municipal, ten preparada unha xornada de portas abertas para “que a xente veña a vexa os cambios que se fixeron no edificio”.

O albergue aproveitou o inmoble do antigo Centro de Iniciativas Empresariais, que foi reformado e equipado polo concello para o seu novo uso. A pousada conta con 23 camas, unha delas adaptada, e con baño propio e unhas instalacións de cociña.

A apertura chega xusto a tempo para os meses de maior tránsito cara a Santiago de Compostela; xullo, agosto e setembro. “Xa empezan a pasar peregrinos pola vila, pero de momento non moitos”, explica Lilian, emocionada co proxecto que ten entre mans, que vai máis aló de atender aos peregrinos e de manter as instalacións.

CONTACTO COA COMUNIDADE

Queremos que estar no albergue lles axude a coñecer Vegadeo de verdade, e a entrar en contacto coa comunidade”. Unha das iniciativas para lograr esa comunión será convidar a veciños e peregrinos a compartir conversas e receitas na cociña, onde tamén prepararán menús para ofrecer aloxamento e comida aos viaxeiros –“menús vexetarianos e con produtos ecolóxicos”.

Nestas primeiras semanas, contará coa compañía de “Elodi, unha rapaza da Bretaña Francesa que se dedica a dar masaxes no Camiño e que compartirá con nos un tempo, axudándonos tamén cos idiomas”, comenta Lilian, que chegou do Brasil a Vegadeo hai catro anos. “Ao pouco de chegar fixen o Camiño coa miña filla, foi unha experiencia moi bonita. Tamén estiven como voluntaria nunha casa donativo en Mondoñedo”, conta.

PERDA DE CAMIÑANTES

Estas actividades de dinamización do albergue responden a intención do goberno municipal de recuperar o paso histórico do Camiño pola localidade. Os criterios de adxudicación do albergue premiaban as ofertas con proxectos de dinamización para potenciar as instalacións e traer viaxeiros á vila. A ruta natural para pasar de Asturias a Galicia levaba aos camiñantes por Vegadeo, Abres e Trabada ata Mondoñedo pero a construción da Ponte dos Santos ofreceu unha alternativa nova aos peregrinos, que atravesan a ponte ata Ribadeo, e seguen logo por Barreiros e Lourenzá.

TRABALLO CON ESCOLAS E COLECTIVOS

A intención da xestora das instalacións é manter o albergue “vivo” tamén nos meses de outono e inverno. “Traballaremos con escolas e asociacións para iniciar aos nenos e animalos a facer o Camiño. Faremos etapas pequenas desta ruta e convidaremolos a pasar noites aquí”, explica. Antes, o 10 de agosto, organizarán o primeiro Festival do Peregrino.

1 COMMENT

  1. Non sei como sodes capaces nun artigo en galego poñer *Vegadeo, non sei se é incultura ou non se sabe que: A VEIGA!!!

RESPOSTAR

Please enter your comment!
Please enter your name here