O Partido Popular (PP) de Ribadeo asegurou este luns que o abastecemento de auga “non é un tema prioritario” para o goberno local, pois “non se interesou en 16 anos por solucionar os problemas de roturas da canalización e de presión de auga”.
Despois de que o alcalde de Ribadeo, o nacionalista Fernando Suárez Barcia, pedira conxuntamente coa rexedora de Trabada, a socialista Mayra García Bermúdez, audiencia co presidente da Xunta de Galicia trala última rotura da traída que vén desde Vilarbetote, con canalizacións de fibrocemento de décadas de antigüidade, o voceiro da formación conservadora, Daniel Vega, responsabiliza ao primeiro edil de que “tanto a veciñanza do casco urbán como das parroquias do rural sofren problemas coa presión da auga, que en ocasións non é suficiente para o normal desenvolvemento de tarefas habituais nunha vivenda”.
POLÉMICA POR UN PROXECTO SEN LICITAR
Vega salienta que o abastecemento de auga “é competencia municipal” e insta a Suárez Barcia a “dar explicacións aos veciños e veciñas de Ribadeo sobre o motivo polo que impediu no 2014 a mellora do abastecemento cando a Xunta dispuña dos proxectos e os fondos europeos e propios para cofinanciar as obras”.
Segundo o concelleiro do PP ribadense, “naquel momento o alcalde do BNG bloqueou o avance do proxecto ao non poñer a disposición da Xunta os terreos para a construción de novos depósitos de captación de auga”.
A pasada semana, Suárez Barcia reclamou que se retome o proxecto elaborado “hai oito anos” para substituír a tubaxe desde Vilarbetote, unha actuación que suporía un investimento de máis de 5,5 millóns de euros.
Nese mesmo 2014, o Goberno galego fixo unha separata para unha primeira fase, onde se construiría un depósito de auga por 1,5 millóns de euros. O alcalde lamentou que “nunca se soubo nada máis destes dous proxectos”, sen licitar.
O PP PIDE USAR “ORZAMENTO PROPIO”
Vega asevera que, dado que o Concello “recada impostos”, tamén “pode investir orzamento propio para contribuír a facer realidade estas melloras canto antes”. O edil popular dubida da posibilidade de que haxa “colaboración institucional” porque, argumenta, “a actitude de crispación de Suárez Barcia dificulta o desenvolvemento de proxectos en beneficio dos ribadenses”.
