O Concello de Burela anunciou que este luns entrará en funcionamento un novo aparcadoiro municipal ubicado preto da escola infantil da avenida da Mariña, a fin de que as familias do alumnado dos centros de ensino da zona teña un servizo de estacionamento.
O alcalde en funcións, Alfredo Llano, explicou que o aparcadoiro “vai ter capacidade suficiente para os pais dos alumnos que van a eses centros e tamén para os profesores. Polas súas dimensións e facilidade de acceso creo que vai ser útil”, indicou o rexedor, que espera que “sexa ben empregado e que sirva para gañar seguridade e axilidade á hora de deixar os rapaces”.
SERVIZO “MOI DEMANDADO”
Llano, que visitou o aparcadoiro co concelleiro de obras en funcións, Ramiro Fernández Rey, asegura que o servizo “era algo moi demandado e fíxose o antes posible. Pensamos que vai servir para cubrir esta demanda”, conclúe. Nesta área ubícanse a escola infantil antes mencionada e tamén o colexio de infantil e primaria Virxe do Carme, tamén coñecido como Os Castros.