O Concello de Cervo iniciou a construción dunha beirarrúa de 1,65 metros de anchura que conectará todo o polígono de Cuíña, a fin de mellorar a seguridade nunha zona que conta cunha afluencia de viandantes.
O alcalde de Cervo, o popular Alfonso Villares, e a edil de obras, Mali Méndez, supervisaron a actuación, que ten un prazo de execución de tres meses e que conta cun orzamento total que ascende a 150.000 euros.
O 70% deste presuposto procede da Xunta de Galicia, a través do programa de axudas de Mellora de Infraestruturas dos Parques Empresariais da Consellería de Industria.
SEN ESPAZO DIFERENCIADO PARA VIANDANTES
Villares destacou a importancia “desta obra que executamos nunha zona que ata o momento carecía de espazos diferenciados para os peóns nese tramo que abrangue medio quilómetro de lonxitude “polo que con esta actuación, que enlazará todo o polígono, melloramos substancialmente á seguridade, favorecendo a convivencia do tráfico rodado e dos viandantes”.
O investimento inclúe, ademais da execución desta beirarrúa na Avenida da Veiga, a instalación do tendido eléctrico, o aglomerado do aparcadoiro do IES Marqués de Sargadelos e a reposición do firme diante do centro de día-residencia.