En Marea anunciou este xoves que formulará unha pregunta no Parlamento de Galicia para interpelar á Xunta polas obras no Ceip de Cervo. As familias denunciaron o pasado mércores problemas de goteiras e filtracións de auga, ademais da inoperatividade da caldeira nova de pellets, polo que alumnado e profesorado padecen frío e humidade nas aulas. A Federación Provincial de Asociacións de Nais e Pais de Lugo (Fapacel) apoiou tamén a reivindicación, acusando ao Goberno galego de “incumprir” os prazos e de “falta de interese” no remate das actuacións.
En Marea lembra que no pasado mes de setembro a Consellería de Educación “asegurou que as obras do colexio de Cervo estaban rematadas e as instalacións listas para o seu uso educativo”. Daquela, as familias decidiron por unanimidade non levar aos pequenos ao colexio durante unha semana pola falta de condicións axeitadas de “seguridade e hixiene” da escola.
Con todo, “a día de hoxe o centro, os seus alumnos e o profesorado padecen unha situación inaceptable para o normal desenvolvemento da actividade educativa”, criticou.
TRABALLOS EN HORAS LECTIVAS
A comunidade educativa, expón a formación, “padece unha situación que afecta seriamente á vida educativa, con frío nas aulas, goteiras, filtracións de auga a través de fiestras instaladas, pero non rematadas, e obras que entorpecen as clases”.
Os pais tamén sinalan, indica En Marea, “que hai goteiras noutros locais como vestiarios e aseos, e filtracións de auga en paredes pintadas hai aproximadamente dous meses. Ademais dos problemas derivados das obras, o centro padece outras deficiencias: a cociña segue sen extractor, a pesar da promesa de Educación de telo amañado hai máis dun mes”.
Outra das eivas da actividade escolar é “o ruído de taladros e maquinaria dentro do colexio nas horas lectivas resulta moi molesto e acaba por ser un gran problema para os alumnos. A pesar desta situación, as obras avanzan moi lentamente e durante as últimas semanas apenas se viu personal traballando na reforma do colexio”, lamenta En Marea.
A CUBERTA, SEN REMATAR
Dende a Fapacel amosan a súa “preocupación” polo “incumprimento reiterado dos prazos de execución” nas obras do Ceip de Cervo e o “desleixo” co que a Consellería de Educación “vén tratando esta grave situación”.
“Voltamos condenar tanto a falta de previsión na planificación das obras como a falta de interese no seu remate”, indican, para afearlle á Xunta “a súa falta de seriedade”.
“Hai problemas de humidade, a caldeira de calefacción prevista non está instalada, a cuberta do edificio está sen rematar”, remarca a Fapacel, que considera as queixas das familias “máis que xustificadas”. Deste xeito, a federación de Anpas provincial esixe á Consellería de Educación “que axilice dunha vez o remate das obras”.