A Deputación de Lugo formará a mozos da Mariña Lucense en enerxías renovables a través do programa ‘Prende! Bota raíces no rural‘, un proxecto para crear emprego xuvenil e fixar poboación nas zonas de menor densidade da provincia.
O presidente do goberno provincial, José Tomé, xunto ao deputado de Promoción Económica e Social, Pablo Rivera, presentou este xoves o plan de emprego, que conta cun orzamento de 300.000 euros, achegados nun 92% polo Fondo Social Europeo.
PERFIL DO BENEFICIARIO
O programa está dirixido “a un dos colectivos que o teñen máis difícil para encontrar un emprego”, explican desde o goberno provincial: menores de 30 anos, desempregados, que non estean a estudar. Deben estar inscritos no Sistema de Garantía Xuvenil e empadroados en concellos lucenses de menos de 5.000 habitantes ou de entre 5.000 e 10.000 que presentan un saldo demográfico negativo na última década.
En concreto, os concellos dos que poden ser os beneficiarios son 55 dos 67 municipios da provincia, é dicir, o 82% do total. Son os seguintes: Carballedo, Taboada, Portomarín, Quiroga, Ribas de Sil, Paradela, Samos, Triacastela, Bóveda, Pantón, A Pobra de Brollón, O Saviñao, Sober, Antas de Ulla, Palas de Rei, Monterroso, O Incio, Castroverde, O Corgo, Friol, Guntín, Rábade, Meira, Pol, Riotorto, Láncara, Begonte, Cospeito, Muras, A Pastoriza, Xermade, Alfoz, Lourenzá, Mondoñedo, O Valadouro, Cervo, Ourol, O Vicedo, Xove, Barreiros, A Pontenova, Trabada, Abadín, Baralla, Becerreá, Cervantes, Navia de Suarna, As Nogais, Pedrafita do Cebreiro, Baleira, A Fonsagrada, Negueira de Muñiz, Ribeira de Piquín e O Courel.
60 PRAZAS
O plan de emprego conta con dúas fases, unha de formación teórica e outra de experiencia laboral. Na primeira parte, 60 mozos e mozas recibirá formación en catro actividades profesionais que, remarcan desde a Deputación, “contan cun importante peso no tecido produtivo da provincia e que contan cun gran potencial de crecemento”.
Unha delas será enerxías renovables, unha formación que se impartirá na Mariña polas oportunidades do sector nesta comarca.
Outra hostalería e turismo, formación que terá lugar na Ribeira Sacra ante o crecemento que está a vivir o sector na zona sur da provincia.
A mocidade da Montaña poderá beneficiarse da formación impartida en xestión forestal, dado o peso específico do sector nesta zona.
Finalmente, agricultura e gandería desenvolveranse na zona centro pola súa importante concentración de explotacións agrícolas e gandeiras.
As persoas interesadas nunha formación que non se desenvolva na súa zona poderán participar igualmente. A maiores, tamén se ofrecerá unha acción formativa específica en autoemprego para aquelas persoas que queiran emprender o seu propio negocio.
A formación terá unha duración de catro semanas, período durante o que os participantes percibirán unha remuneración de case 14 euros por día.
AXUDAS ÁS EMPRESAS PARA AS CONTRATACIÓNS
Na segunda fase do programa, a Deputación concederá axudas a empresas vinculadas cos anteriores sectores produtivos para que contraten durante 8 meses aos mozos e mozas que recibiron a formación, e poidan así adquirir experiencia laboral. O importe da axuda que recibirán as empresas será de 4.410€ por cada persoa contratada.
Pola súa banda, os traballadores e traballadoras contratados percibirán como mínimo 900 euros ao mes. Ademais, a aqueles participantes no programa que decidan emprender, a Deputación concederalles unha axuda de 5.510 euros para poñer en marcha o seu proxecto empresarial.
INICIARASE A PRINCIPIOS DO 2020
A Deputación prevé, segundo explicou Tomé, que as bases para apuntarse neste novo plan de emprego queden aprobadas a finais de mes e que o período de formación comece a principios de ano.
“Queremos que a xente nova se quede a traballar e a vivir no noso rural, e con este novo programa que hoxe presentamos dámoslles ferramentas para conseguilo, axudándolles con formación e experiencia laboral a atopar un futuro nos seus concellos ou nas súas comarcas, ben sexa como emprendedores ou por conta allea”, subliñou o presidente da Deputación.