O BNG critica “o engano” da Xunta sobre o Ceip de Cervo, que “non estará listo neste ano escolar”

O voceiro dos nacionalistas cervenses lamenta o estado do colexio dous meses despois do inicio, "sen biblioteca nin ximnasio e con filtracións de auga"

Obras no Ceip de Cervo. AXM

O voceiro do BNG de Cervo, Diego Fernández, criticou este venres nun artigo de opinión as “deficiencias” no Ceip de Cervo por mor de que continúan as obras de reforma dous meses despois do prazo establecido pola Xunta de Galicia para o inicio do curso. “Non hai biblioteca nin ximnasio. O que si segue habendo son filtracións de auga e espazos do colexio que son inaccesibles para o alumnado porque están ocupados co material das obras”, enumera.

O concelleiro nacionalista censura os “folios e folios de mentiras” da Consellería da Educación respecto das actuacións, que “asegurou que garantiría que as aulas estarían listas para que os escolares iniciasen as clases” ou que “os últimos retoques vanse realizar fóra de horario lectivo e non van interferir para nada na actividade escolar”, cando as obras “si se están a realizar” paralelamente ás actividades educativas. Fernández lamenta que “non vai coa Xunta nin co PP o informar debidamente á comunidade escolar e procurar solucións ao problema”.

“Todos sabemos que neste ano escolar aínda non rematarán as obras. Enganaron a todo o mundo”, afirma o edil, que pregunta “para cando a inauguración do colexio”. O concelleiro mostrouse tamén crítico co Concello de Cervo, acusando ao alcalde, Alfonso Villares, de estar “desaparecido do mapa” neste tema, cunha actitude “totalmente censurable”. Podes consultar o artigo completo nesta ligazón. nota (1)

RESPOSTAR

Please enter your comment!
Please enter your name here