O Servizo Galego de Saúde (Sergas) e a empresa adxudicataria dos traballos asinaron este luns a acta de replanteo coa que se dá inicio ás obras de reforma das fachadas, carpintería exterior e envolventes térmicas do Hospital Público da Mariña. Unhas actuacións que contan cun investimento de 1,9 millóns de euros, co obxectivo, segundo expón a Xunta, de “mellorar e aumentar a eficiencia enerxética” do centro hospitalario mariñao”, ademais de “unificar esteticamente o seu conxunto de edificios”.
As obras, que deron comenzo esta semana, inclúen “a eliminación de pontes térmicas renovando toda fachada do edificio inicial do Hospital da Mariña e substituíndo a súa carpintería exterior e vidros. Deste xeito, non só se mellorará a eficiencia enerxética, senón tamén o illamento térmico e acústico do centro hospitalario”, indica o Sergas.
A adxudicación das obras, cofinanciadas nun 80% polo Programa Operativo FEDER-Galicia, recaeu na empresa OGMIOS.
O Sergas explica que previamente ás actuacións “realizouse unha auditoría enerxética do edificio principal existente para estudar as necesidades de illamento e eficiencia que precisaba”. Os traballos implicarán a substitución da carpintería exterior do edificio inicial, a maioría del de dobre ventá e sen rotura de ponte térmica, por novas carpinterías e vidros de control solar de baixa emisividade, en detrimento dos vidros monolíticos instalados actualmente.
A reforma tamén “suporá a mellora da envolvente térmica (fachadas e cubertas) do edificio inicial do Hospital da Mariña e a eliminación de pontes térmicas. Para iso, implementarase un sistema de illamento térmico exterior para a completa rehabilitación da envolvente, e instalaranse fachadas ventiladas, con placas de formigón polímero”, concreta a Xunta de Galicia.
AMPLIACIÓN
No tocante á segunda fase da ampliación do Hospital da Mariña, o Sergas indica que “a reforma das plantas de hospitalización xa está rematada e séguese a actuar na área de consultas externas“.